oliejagt
Isornartorsiut: Mærskip isumannaatsuunikkut Kalaallit Nunaat tativaa
– Maerskip siunnersuutaa ersarissumik Kalaallit Nunaannik tatisineruvoq, sumiiffimmilu misileraalluni qillerivissami taama ulorianaateqartigisumi isumannaatsuunermut malittarisassanik ersarissumik sakkukilliiniarnerulluni - Maersk Oil-ip isornartorsiuineq tunuartippaa
Maersk Oil-ip Kalaallit Nunaanni uuliasiornermi milliardilinnik iluanaaruteqarnissamik sinnattuni pissutigalugu maanna Kalaallit Nunaanni Namminersorlutik Oqartussat tamakkiisumik tatilerpai. Metroexpress naapetorlugu taamatut naliliivoq Danmarkimi tamatumani immikkut ilisimasalinni siuttoq Kai Sørensen.
Taanna taamatut qisuariarpoq uuliasioqatigiiffissuaq nalunaarmat misiliilluni qillerinissat sioqqullugit namminersorlutik oqartussat isumannaatsuunermut piumasaqaataat malinniarnagit.
Piumasaqaatit ilaatigut ilagaat tamatigut qilleriviit marluusassasut aammalu immap sikunissaa qaammatinik marlunnik sioqqullugu qillerinerit unitsinneqartassasut. Maersk Oil-ip pisortaa Carsten Sønderskov malillugu tamakkua akisuvallaaqaat.
– Pineqarpummi qillerinissat akisoorujussuit. Manna tikillugu oqartussaasunit piumasarineqarpoq qilleriviit marluussasut. Tamanna suli oqaaseqarfigivallaarsinnaanngilara, naatsorsuutiginngilarpulli qilleriit marluk atussallutigit, taanna maajimi AG-mut taamatut oqarpoq.
Tamanna peqatigalugu nassuiaatigaa qaammatinik marlunnik killissaqartitsinerup appartinnissaa sulissutigineqartoq.
Tamanna pissutigalugu uuliasiornermi immikkut ilisimasalik mianersoqqussuteqarpoq. Misiliilluni qillerinerit qillerinernit tamanit ulorianarnersaapput, isumannaatsuunerlu sakkukillineqassappat taanna malilugu ajutoortoqarnissaanut ulorianartorsiorneq anginerulissaaq.
– Maerskip siunnersuutaa ersarissumik Kalaallit Nunaannik tatisineruvoq aammalu ima ulorianartigisumi misiliilluni qillerinermi isumannaatsuunermut malittarisassat ersarissumnik sakkukilliniarneqarmata paasisinnaanngilluinnarpara taamaasiornissaq qunugineqarsimanngimmat, Geus-imi pisortap tullerisimasaa soraarneq aammalu uuliasioqatigiiffiup Statoil-ip uuliaqarfinnik ujaasinermi pisortarisimasaa Kai Sørensen oqarpoq.
Maersk Oil-ip isorinninneq tunuartippaa
Louise Münterip, Maersk Oil-imi tusagassiornermik sulisup, Metroexpress-imut e-mail-ikkut eqqunnginnerarpaa isumannaatsuuneq sakkukilliniaritsik aningaasat pissutivgalugit:
– Isumannaatsuunermut malittarisassat sakkukillineqarnissaat Maersk Oilip sulissutiginngilaa, suliniutitsinnilu tamatigut periutsit pitsaanerpaat qularnaannerpaallu atorniartarpavut, nunarsuarmi sumiikkaluaruttaluunniit, Maersk Oil oqarpoq, isumaqarporlu immikkut periusikkut cap-and-secure-system-ikkut isumannaatsuuneq ingerlanneqarsinnaasoq.