suleqatigiinniarneq
Isornartorsiuisoqarnera Uldumimit oqaaseqarfigineqarpoq
Inuit Ataqatigiinnit Sara Olsvigip oqaaserisai Naalakkersuisunut ilaasortaasup Anda Uldumip Demokraatineersup paasisinnaanngilai - ulluni 100-ni eqqissilluni sulinissani kissaatigaa
- Uggornarpoq IA-p aggersaanerput siulleq tusarsimanngimmassuk, taamalu danskit tusagassiorfii aqqutigalugit suleqatikkuminaannerarluta isornartorsiortariaqalerluta.
Aningaasaqarnermut aatsitassarsiornermullu Naalakkersuisoq Demokraatineersoq Anda Uldum allappoq. Inuit Ataqatigiinni siulittaasup Sara Olsvigip Informationenimi oqaatigisaanut oqaaseqarpoq. Sara Olsvig danskit aviisiannut oqarpoq Naalakkersuisuusut suleqatiginnikkumanngittuusut.
Anda Uldumip Aningaasanut Inatsisissap 2015-imoortup amerlanerpaanit isumaqatigiissuteqarfigineqarnissaa siunertaralugu partiit tamarmik februaarip aallartinnerani qaaqquniarlugit oqarpoq, taamaattumik oqaaserineqartut paasisinnaanngilai.
- Naalakkersuisut suliassaqarfitsik paasisaqarfigissallugu piffissaqartariaqarsimapput, suliniutillu soorlu Aningaasanut Inatsisissap suliarinera aallartisartariaqarsimallugit. Taamaammanuna Naalakkersuisunngortut ulluni 100-ni siullerni eqqissisimatinneqartarnerat ileqquusoq. Partiit suleqatiginissaat qilanaarivarput, tassami innuttaasunut, inuiaqatigiinnut inuussutissarsiortunullu iluaqutaasumik aningaasaqarneq pillugu politikkimik qularnaariniarluta amerlanerpaanik isumaqatigiissuteqarnissarput kissaatigaarput, Anda Uldum, naalakkersuisuunermi saniatigut naalakkersuisut siulittaasuanut tullersortaasoq, oqarpoq.
Pituffik pillugu suliami paasinarsisoq
Pituffimmi kiffartuussinissamut isumaqatigiissutip annaaneqarsimaneranut Københavnimi oqallinnermi paasinarsivoq, qanoq partiit suleqatigiinniarnerat attaveqatigiinniarnerallu ajornartorsiutaasoq.
Danmarki peqatigalugu Pituffimmi Kalaallit Nunaannut taartisiaqartitsisoqarnissaa anguniarneqassasoq Naalakkersuisut siulittaasuata Kim Kielsenip Siumumeersup statsministeri Helle Thorning-Schmidt, Socialdemokraaterne, tusagassiortunut katersuutitsinermi peqatiginerani januaarip arfineq aappaanni oqarnera Inuit Ataqatigiinni siulittaasumit Sara Olsvigimit isornartorsiorneqarpoq.
Tassani tusagassiortunik katersortitsinermi Kim Kielsenip oqaatigaa Sara Olsvig suleqatiginiassallugu ajornakusoortuusoq danskit aviisiannut Informationenimut oqarpoq. Isumaqatigiissutigineqareersimasut Inuit Ataqatigiinnit allanngortinniarneqartarnerat tassani eqqartorneqarpoq.
Taamatut oqartoqarnera Sara Olsvigimit ataasinngormat akerlilerpaa.