it
Isornartorsiuineq Microsoftimit oqaaseqarfigiumaneqanngilaq
Namminersorlutik Oqartussat Microsoftimut isornartorsiuinera, suliffeqarfissuup oqaaseqarfigiumanngilaa
- Ajornartorsiutip aaqqiivigineqarnissaa soorluuna soqutigineqarpianngitsoq. Kalaallit Nunaanni Naalakkersuisut uani eqqugaaqataasut soorlu paasineq ajoraat.
Namminersorlutik Oqartussat IT-mi pisortaata Tony Ditlevsdalip Microsofti marlunngormat taamatut isornartorsiorpaa.
Taamatulli isornartorsiuisoqarnera Microsoftimit oqaaseqarfigiumaneqanngilaq. Microsoftip Danmarkimi attaveqaqatigiinnermut aqutsisoqarfia taamatut ilisimatitsivoq.
Tamatumunnga pisutaassimavoq Namminersorlutik Oqartussani sulisut ilaata nammineq qarasaasiani atorlugu Namminersorlutik Oqartussat webmailiannut januaari qaammat naalersoq isersimasimammat.
Sunaaffa qarasaasiaq taanna malwarenik imaqarsimasoq, tamannalu pissutigalugu Namminersorlutik Oqartussanit mailit tusintilippassuit nassiussuunneqarsimallutik. Akunnerit arlaqanngitsut qaangiummata Namminersorlutik Oqartussanit maleware-t qarasaasiamit tassannga pisut unitsinneqarput ingerlaannarlu Microsoft attavigineqarpoq ajornartorsiut aaqqinneqarsimasoq nalunaarutigalugu, Namminersorlutillu Oqartussat mailsystemiat ajoquteqarunnaartoq unnerlugu.