sulisussaaleqineq
Isornartorsiuineq: Meeqqeriviit inatsisit malinngilaat
Pædagoginik annertuumik amigaateqartoqarpoq, allaat assersuutigalugu meeqqeriviit, meeraaqqeriviit aamma atuarnerup avataatigut ornittakkat inatsisini piumasaqataasut naammassinissaat ajornakusoortippaat
Ukiuni kingullerni Nunatsinni tamani paaqqinnittarfinni perorsaasunik annertuumik amigaateqartoqarpoq.
Ajornartorsiullu annertungaarmat, paaqqinnittarfiit arlallit inatsisitigut piumasaqaatit naammassinissaat ajornakusoortittarpaat, Nunatsinni Perorsaasut Kattuffiat (NPK) taama aarlerisaarivoq.
Pingajoraarterutaat amigaatigigaat
- Perorsaasutut atorfiit 80-it ilinniarsimasuinnarnik inuttaqartinneqassappata, Nuummiinnaq pædagogit 28-t amigaatigineqarput. Ilaatigullu Nunatsinni paaqqinnittarfiit ilaat ilinniarsimasunik perorsaasunik sulisoqarneq ajorput, imaluunniit pisortaq pisortalluunniit tullia kisimi ilinniarsimasuusarpoq, NPK-mi siulittaasoq Naussúnguaq Bisgaard naqissusiivoq.
- Tamassuma inatsisinik naammassinninnissaq ajornakusoortoq takutippaa, inatsisaavoq minnerpaamik ataatsimik perorsaasoqassasoq, isumaginninnermut ikiorteqassasoq aamma paaqqinnittarfinni inini tamani ataatsimik ikiorteqassasoq, ilanngullugu siulittaasoq oqarpoq.
Taassuma paaqqinnittarfiit neqeroorutaat 'pitsaassutsimigut appasittumik' oqaatigisariaqarnerarpaa - taamaattumillu Meeqqerivitsialaap perorsaanermik ineriartortitsisumik neqerooruteqarnermik siunertaanut naapertuunnginnerarlugu.
Sulisut qimarnguttut
Siulittaasup perorsaasunik amigaateqarnermut suna peqqutaanersoq qularutiginngilaa.
Ukiut tamaasa perorsaasunik ilinniartunik naammassisoqartarpoq, kisianni paaqqinnittarfinnut qinnuteqarneq ajorput.
- Siullermik aallaqqaasiutigalugu perorsaasut akissarsiaat- aamma atorfininnermut tunngatillugu atugassarititaat qiviarneqartariaqarput. Perorsaasut ilinniarnerminnik naammasseqqammersut tunngaviusumik qaammammut 19.023,32 koruunit akissarsiarisarpaat, tamannalu 1991-imi 14.086,67 koruunimiippoq. Tassalu ukiuni 16-ini 4.954,65 koruuninik qaffariarsimapput. Tulliani aappaagu isumaqatiginninniartoqalerpat annertunerujussuarmik piumasaqartoqassaaq, Naussúnguaq Bisgaard erseqqissaavoq.