Isornartorsiuineq: - Kujallermi meeqqanut isumaginnittoqarfik tukattoq

Allaaserineqarsimasumi Kommune Kujalleq Qeqqata Kommunia eqqaaneqarsimapput. Allaaserisamilu Kommune Kujalleq kisiat pineqarpoq. Tamanna utoqqatsissutigaarput.

Kommune Kujallermi meeqqat inuusuttullu sullinneqarnerat suli tukappoq.

Saginik suliaqartartoq Jakob Noahsen taama isumaqarpoq. Taassuma kommunip atorfinitsitsiniartarnera misissorsimavaa paasisimallugulu tukattorujussuarmik suleriaaseqartoq.

- Meeqqat naakkinarput

Suliai, atorfeqarneranut isumaqatigiissut suliffialu pillugit aqulluarneqarsimannginneri oqaluttuarivai.

Taanna ilaatigut meeqqamut tunngasumik paasissutissanik tunineqarsimavoq naak nipangersimasussaatitaanermut atsiortinneqarsimanngikkaluarluni.

Jakob Noahsen Kommune Kujallermi isumaginnittoqarfimmi aqutsisuluttoqarnera patsisigalugu sulerusukkunnaarsimavoq.

- Meeqqat, inuusuttut ilaqutaasullu naakkinaqaat, taakkumi iluamik sullinneqarsinnaanngillat, Jakob Noahsen oqarpoq.

Suliassanut paasissutissanik kissaateqartoq

Jakob Noahsen nammineq kajumissutsiminik Kommune Kujallermut atorfimmik qinnuteqarnerminik sulilerpoq.

CV-ani takuneqarsinnaavoq Jakob Noahsen, Nuup Kommuniani kingorna Kommuneqarfik Sermersuunngornikumi ukiut 20-it sinnerlugit isumaginnittoqarfimmi sulisimavoq, taakkunanilu ukiuni 12-ni aqutsisutut atorfeqarsimalluni.

Atuaruk: Meeqqat illersuisuat Kujallermi pisut eqqasuutigai

Jakob Noahseni isumaginnittoqarfimmi meeqqanut inuusuttunulli ingerlatsivimmi atornitsinneqarnissaanut neqeroorfigineqarpoq kingornalu atorfinikkallarnissamut isumaqatigiissummik neqeroorfigineqarsimalluni.

Jakob Noahsen suliassarilerumaakkaminut paasissutissanik piumasimangaluarpoq, akineqarsimananilu.

Mittarfimmi inuttassarsiusoqartoq tusarsimangaa

Taamaakkaluartoq Qaqortumut novembarip qaammataani aallarsimavoq. Neriorsorneqarsimavormi apeqqutai akissuteqarfigineqarumaartut.

Atuaruk: Isumaginnittoqarfik tukattoq paasisat nutaat uppernarsarpaat

Angalanermilu nalaani ilisarisimasani Narsarsuup mittarfiani naaperiasaarsimavaa tassani nalunngisaata tupaallaatigeqisaanik oqaluttuussimavaa Jakob Noahseni Ilaqutariinnut sullissivimmi atorfinitsinneqarsimasoq. Pineqartoq kommunimi attuumaasuteqannginnami tamakka nalusussaagaluarlugit.

- Tupaallaatsinneqarpunga kalerrinneqarnikuunnginnamami ingerlatsivimmi atorfinitsinneqarsimallunga.

Suliat mianernartut nipangersimasussaanermut piumasaqaatitaqanngitsut

Qaqortumut tikikkami kommunimukarsimavoq, tassanilu uppernarsivaa Ilaqutariinnut sullissivimmi atorfinitsinneqarsimalluni.

Jakob Noahsen tikilluaqquneqarsimavoq, Jakob Noahsenilu aqutsisuusumit oqaluttuunneqarsimanngilaq suut suliarissanerai.

Taassumalu misissorumallugit neriorsuisimavoq.

Tassani Jakob Noahsen meeqqanut suliassat mississoqqullugit tunniunneqarsimapput.

- Suliassat mianernartuupput, uangalu atorfininnissamut nipangersimasussaatitaanermulli suli atsiungaqarsimanngilanga.

- Suliassat taama ittut tigummisinnaanngikkaluarpakka, Jakob Noahsen oqarpoq.

Journalit amingaatillik

Ilaqutariinnut sullissivimmi 'inuit aqqusinermiit tigusat' ikiorniarlugit neqeroorfigineqartartut, oqaluttuaraa.

Jakob Noahsen aallaavigalugu suliat saginut allattorneqarneq ajorput. Sullissiviup ilisimanngilaa innuttaasut kikkut ikioqqullutik saaffiginnittarnersut, Jakob Noahsen isumaqarpoq.

- Ilisimasaqanngillat

Sapaatit akunneri sisamat qaangiummata HR-chefi ataatsimeeqatigisimavaa. Tassanilu atorfinnut marlunnut inuttassarsiuunneqarsimanngitsunut neqeroorfigitissimalluni.

Eqqarsaatigilluareerlugulu qujaannarsimavoq nalunaarutigalugulu, tukattumik sulineq pissutigalugu isumaqatigiissummik atsiorusugani.

Tamannali Jakob Noahsenimut suliat aqilluarneqannginnerinut takussutissaannaavoq.

- Suut suliarineqartarneri kinalu akisussaasuunersoq, aqutsisuniik ilisimaneqanngitsut taarusuppara, Jakob Noahsen oqarpoq.

Isornartorsiuineq Kujalliup tusarsimanngilaa

Jakob Noahsenip isornartorsiuinera Kommune Kujalliup ilumuunnginnerarpaa.

- Jakob Noahsenip oqaluttuai eqqortuunngillat, Peter Sonberg, isumaginnittoqarfimmi pisortaagallartoq, Sermitsiaq.AG-mut mailikkut allappoq.

- Jakob Noahsenip atorfinitsinneqarsimanera pillugu oqaaseqarsinnaanani oqaatigaa, tassani inuit ataasiakkaat pineqartillugit oqaaseqaqqusaannginnami, Peter Sonberg erseqqissaavoq.

Tupigusuutigaalu Jakob Noahsenip toqqaannartumik isornartorsiuisimannginnera tupigusuutigaa.

- Jakob Noahsen uannut, qullersannulluunnit ileqqut malillugit isornartorsiuisimanngilaq, Peter Sonberg allappoq.

Allanit tusarsimangaa

Jakob Noahsenip taamatut saqqummerneranut pissutaasinnaasoq, taamatut ingajattumik tukattumik sulisoqarsimaneranut tunngasumik allanit tusangaqarsimanera.

Jakob Noahsenip aamma tikkuarpaa, Namminersornerullutik Oqartussat nakkutilliisuisa MIO-llu, Kommune Kujalliup meeqqanik inuusuttunillu sullisseriaasit isornartorsiuisimanerat.

- Kommuni ajornartorsiutinik qanoq isilluni aaqqiiniarpa, aaqqissungaanikkut tukattorujussuupput sulisuminillu qimarratsitsisarluni, Jakob Noahsen oqarpoq.

Kommune Kujallermi isumaginnittoqarfiup sullissinerlunnera misigisaqarfigisimangukku tusarusuppatsigit, uungalu allassinnaavutit: walter@sermitsiaq.gl