Isornartorsiuineq Asiip akerlilerpaa: Suut tamaasa saqqummiunnikuuagut

Allaaserisami: Politikeri Siumumeersoq: Sermersuup aninera inatsisinik unioqqutitsineruvoq, kommunalbestyrelsimut ilaasortaq Peter Davidsen (S) oqarpoq kommunip Kanukoka-mit aninissaanik amerlanerussuteqartut aalajangernerat inatsisinik unioqqutitsinerusoq, pissutigalugu kinguneqaataasinnaasut kommunalbestyrelsimut paasissutissiissutigineqarsimanngimmata.

Taamatulli oqarnera Kommuneqarfik Sermersuup borgmesteriata Asii Chemnitz Narupip (IA), paasisinnaanngilluinnarpaa.

Nakkutilliisoqarfik

Kanukoka-mit anineq kingullermik novembarip 10-anni kommunalbestyrelsimi oqaluuserineqarmat Siumup gruppia nalunaarpoq kissaatigalugu suliassaq Nakkutilliisoqarfimmit nalilersikkusullugu.

Ernumaginngilaa

Borgmester Asii Chemnitz Narupilli nakkutilliisoqarfiup akulerutsinneqarnissaa ernumanartoqartinngilaa.

– Peter Davidsenip isornartorsiuinera paasisinnaanngilluinnarpara. Kanukoka-mit aninermik suliaq kommunalbestyrelsip suliarisartagaanit immaqa peqqissaarnerpaamik qulaajarneqarsimavoq, borgmesteri tusagassiorfinnut nalunaarutikkut tikkuaavoq.

Peqqissaartumik

– Allattoqarfik kinguneqaatissanik misissuisimavoq, taannalu Kanukokap oqaaseqarfigisimavaa, aningaasanut ataatsimiititalliap aalajangiinerata kingorna. Kinguneqaatissat pillugit eqqartuussissuserisumik attuumassuteqanngitsumik misissuisitsisimavugut, suliassarlu tamanna kommunalbestyrelsimi pingasoriarluta oqaluuserisimavarput, Asii Chemnitz Narup nangilluni oqarpoq.

Isumaqatigiinniarnerit

Peter Davidsenip pingaartumik ernumanartoqartippaa siunissami Kanukoka avaqqullugu akissarsiat ataatsimullu tapiissutit pillugit isumaqatigiinniuteqartarnissat. Tamatumali kinguneqaatigisinnaasai eqqartuussissuserisup misissuineratigut qulaajarneqareersimavoq, borgmesteri erseqqissaavoq.

Ataqatigiissaaqatigiit

– Ataatsimut tapiissutit politikkikkut ataqatigiissaaqatigiinnit isumaqatigiinniutigineqartarput, taamaattumik tamatumani allanngortoqarnavianngilaq. Taamatuttaarlu naligiissaarinermik oqallinneq isumaqatigiinniarnerillu taakkunannga ingerlanneqarsimapput, Asii Chemnitz Narup oqarpoq.

Tusaaniarneqarneq ajorpugut

– Akissarsiat, atorfeqarnermi atugassarisat soraarniuteqarnissamullu atugassarisat pilllugit isumaqatigiinniarnerit Namminersorlutik Oqartussat Kanukokallu isumaqatigiinniutigisarpaat. Tassa tamatumani sunniutaarussimavugut, mannali tikillugu tamakkua pillugit tusaaniarneqartarsimanngilagut, taamaattumik tamanna imatut allannguuteqanngilaq. Akerlianilli ataasiakkaanut atorfeqarnermi atugassarisat nammineq aalajangersinnaasarsimavagut, borgmesteri oqarpoq.

Siumut suniarpa?

Borgmesterip paasiuminaatsippaa Siumup gruppiata nakkutilliisoqarfimmut maalaaruteqarnermigut suna anguniarneraa.

– Soorunami politikkikkut aalajangiisoqartillugu ilisimanngisanik peqartarpoq. Kinguneqaatissanik misissuinermi ersarilluinnartumik saqqummiunneqarpoq kinguneqaatissat suut maannangaaq nalilerneqarsinnaanngitsut. Imaanngilarli inatsimmik unioqqutitsisimasugut, Asii Chemnitz Narup erseqqissaavoq.