Eqqartuussineq
Isornartorsiuineq akerlilerpaat: Video atorlugu apersuisarnermut ukiut qaffanneri ajunngilaq
Naalakkersuisut meeqqat 15-it tikillugit ukiullit eqqartuussivimmi videokkut apersorneqarsinnaanissaannut siunnersuutertik attatiinnarpaat
- Video atorlugu apersuisarnermi ukiunut killigititaasut qaffanneqarpata, inatsisitigut isumannaassuseq ulorianartorsiortinneqarnavianngitsoq isumaqarpunga. Taamaassorinngilluinnarpara. Meeqqat inuusuttullu video atorlugu apersuisartunit, meeqqanik oqaloqatiginninnissamut sungiusarsimasunit apersoqqissaarneqartarnerisigut tamanna qulakkeerneqarpoq.
Oqaatsit taakku atorlugit Kalaallit Nunaanni Eqqartuussissuserisut isornartorsiuinerannut Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko akerliliivoq.
12-nit 15-nut ukiullit
Ullumikkut meeqqat 12-it tikillugit ukiullit video atorlugu eqqartuussivimmukanngikkaluarlutik nassuiaajartunngikkaluarlutik apersorneqarsinnaapput. Taanna ukiunut killerititaq 15-nut qaffanneqarnissaa Naalakkersuisut kissaatigaat.
Partiit tamarmik taanna taperserpaat, kisianni kattuffiup Kalaallit Nunaanni Eqqartuussissuserisut nangaanartoqartippaat. Tassami eqqartuussissuserisoq Finn Meinel Sermitsiamut apersorneqarnermini unnerluunneqartunut ajoqutaaratarsinnaanerarpaa.
Ajornerulersitsisoq
– Inuit eqqartuussivikkut toqqaannartu mik nassuiaasarnissaat pitsaanerpaassaaq. Ukiut killissaritinneqartut, tassa aqqaneq marlunnut killilerneqarsimasut ukiunut 15-inut illilerneqassappata ilisimannittut amerlissapput, taakkulu illersuisunit aperineqanngitsoorsinnaallutik, tassa imaappoq illersuineq pitsaavallaarunnaassaaq unnerluussaasorlu naammaginartumik pillarneqanngitsoorsinnaalluni, Finn Meinel erseqqissaavoq.
Isornartorsiuineq naleqqutinngitsoq
Taamatut isornartorsiuineq naleqqutinngitsoq, Mala Høy Kúko isumaqarpoq.
Video atorlugu apersuinermi illersuisoq inimit allamiit malinnaasinnaasoq. Illersuisoq video atorlugu apersuisoq aqqutigalugu meeqqamut inuusuttumullu apeqquteqarnissamut periarfissaqarpoq.
- Taamaalilluni illersuisup pinerlineqartumut ilisimannittunullu apeqquteqarsinnaanissaa qulakkeerneqassaaq – soorlumi eqqartuussinermi nalinginnaasumi taamatut pisoqartartoq. Taamaattumik unnerluutigisaasup inatsisitigut isumannaassusaa ulorianartorsiortinneqarnavianngitsoq Naalakkersuisut isumaqarput, Mala Høy Kúko tusagassiuutinut nalunaarummi erseqqissaavoq.
Suliaq sukkanerusoq
Taassuma tikkuarpaa, meeqqat eqqarsartarnerat eqqaamasaqartarnerallu inersimasunit allaanerusoq. Aamma meeqqat inuusuttullu pilertornerpaamik video atorlugu apersorneqartarnerisigut, misigisaminnik eqqaamannilluarnerunissaat qulakkeerneqartartoq.
- Tamanna aamma inatsisitigut isumannaassutsimut iluaqutaavoq, tamatumalu saniatigut meeqqat inuusuttullu eqqarsaatigineqartarput. Aamma pilertortumik apersuisarnikkut meeqqat inuusuttullu misigisaminnik suliaqarsinnaanerisa aallartinneqarsinnaanera qulakkeerneqartarpoq. Taamaattumik siunnersuut meeqqat inuusuttullu inatsisitigut isumannaassusaannut annertuumik pitsannguissasoq isumaqarpunga, naalakkersuisoq isumaqarpoq.
Finn Meinelip Sermitisiaq normu 41-mi apersorneqarnera atuarsinnaavat. Pisiniarfinni imaluunniit uani ataani toortakkamipisiarisinnaavat.