agguataarineq
Isornartorsiueqqinneq: Aningaasanik agguataarineq suliarineqaqqilli, Vittus
Sermersuumi Inuussutissarsiornermut Siunnersuisooqatigiinni siulittaasup aningaasaqarnermut naalakkersuisoq Vittus Qujaukitsoq isornartorsiorpaa
Kommuneqarfik Sermersuumi immikkut ittumik ataatsimiinneq nalunaaqutaq 13.00 aallartinneqarpoq. Kommuneqarfik Sermersuumi borgmesteri Asii Chemnitz Narup ataatsimiigiarnissamut aggersaasuulluni.
Kommuninut aningaasanik agguataarineq pillugu ataatsimiigiaqqusisoqarpoq. Tassani nunatta karsianit kommuninut anigaasanik tapiisarnerit Naalakkersuisunit allanngortinneqarnerat oqallisigineqassalluni. Agguataarinermi Kommuneqarfik Sermersooq eqqugaanerpaassaaq.
Ingerlanerlunneq
Kommuneqarfik Sermersuumi Inuussutissarsiornermut Siunnersuisooqatigiinni siulittaasup agguataarineq isornartorsiorpaa.
Siulittaasup Martin Ben Shalmip Kalaallit Nunaanni Naatsorsueqqissaartarfiup suliffissaaleqisut pillugit kisitsisaataani kingullerni takuneqarsinnaasoq eqqartorpaa. Aningaasatigut ajornartorsiornermit illoqarfiit pingaarnersaat eqqugaanerpaajusoq oqaatigaa. Siorna qaammammi tassani suliffissaaleqisut Sermersuumi 12 procentinik amerlisimapput, Qaasuitsup Kommuniani 6 procentinik amerleriarsimasut. Kommune Kujallermi aamma Qeqqata Kommuneani suliffissaaleqisut 2 procentinik amerleriarsimapput.
- Nuuk kisiat isigigaanni ajorluinnarpoq. Ukiuni kingullerni Nuummi suliffissaaleqisut 24 procentinik amerleriarsimapput. Qaqortumi suliffissaaleqisut amerleriarsimanngillat, Ilulissanili 5 procentinik ikileriarsimallutik, Martin Ben Shalmi tusagassiutinut nalunaarummi oqarpoq.
Martin Ben Shalmip qularutiginngilaa, kisitsit ajuusaarnartut tamani aningaasakillisaanermik peqquteqartoq.
Taanna aamma isumaqarpoq, kisitsisit takutinneqartut Aningaasaqarnermut Naalakkersuisoq naligiissaarinissamik isumaliutersuuteqaqqittariaqalersittariaqaraat.
Suliniutit amerlanerusut
- Kommunitsinnit 56 millioner koruuninik aalleqqinnissaq imminut akilersinnaanngilaq, suliffissaaleqisut pillugit kisitsisit malillugit innuttaasut maaniittut aningaasakilliornermik eqqugaanerpaanerat takusinnaagaanni, Martin Ben Shalmi oqarpoq.
Kommuneqarfik Sermersuup siusinnerusukkut misissuisitsinerani takuneqarsinnaavoq, Nuummi suliffissaaleqisut 16 procentii kommuninit allanit ukioq kingulleq nuuttuusut.
- Suliffissaaleqinermit aniguiniarnissaq suliassaavoq annertooq. Sanaartugassalerisut aammalu ilinniakkanik qaffassaanissat eqqarsaatigalugit – aningaasarpassuarnik naleqarpoq, taamaattumik siumukarnissamut kommunit aningaasanik aallerfiginagit akerlianik aningaasanik amerlanerusunik pissarsitinneqartariaqarput, Sermersuumi Inuussutissarsiornermut Siunnersuisooqatigiinni siulittaasoq oqarpoq.