Future Greenland 2015
Isornartorsiorneqareernermi kingorna: Qujaukitsup kommunit pisuutippai
Namminersorlutik inuussutissarsiortuni pisortat pingasut, inuussutissarsiutit pillugit ataatsimeersuarnermi, Future Greenlandimi, sapaatip akunnerani kingullermi pisumi isornartorsiuisoqarnera Vittus Qujaukitsup isornartorsiuisut paasilluarpai. Ajornartorsiutilli allamit pilertartut oqaatigaa
Namminersorlutik Oqartussani sulineq arriippallaarlunilu allaffissortoqarpallaarpoq.
Future Greenland 2015-mi ingerlanneqartumi ilaatigut taama isornartorsiuisoqarpoq. Taamatut isornartorsiuisoqarnera inuussutissarsiornermut naalakkersuisup Vittus Qujaukitsup Siumumeersup qisuariaateqarfigaa.
- Suliat sukkanerisaanerinnut ujartuinerinerat paasisinnaavara, taamaattumik kommunit suleqatigalugit qanoq isilluta sukkanerusumik kiffartuussisinnaanerput oqaloqatigiissutigissuarput, Vittus Qujaukitsoq KNR-imut marlunngormat oqarpoq.
Sulialli arriippallaartumik ingerlanneqartarnerat Vittus Qujaukitsup pisuussuteqarfiginagu oqaatigaa.
- Una nassuerutigisariaqarpoq, Namminersorlutik Oqartussat kommunillu akornanni akisussaaffinnik avitseqatigiissimanermi arlalippassuarni equngasoqarami, Vittus Qujaukitsoq oqarpoq.
Erseqqissumik oqaaseqaateqarnissaq
Namminersorlutik inuussutissarsiortuni pisortat pingasut, inuussutissarsiutit pillugit ataatsimeersuarnermi, Future Greenlandimi, sapaatip akunnerani kingullermi pisumi, Namminersorlutik Oqartussani sulineq arriippallaarlunilu allaffissortoqarpallaartoq ilaatigut uparuarpaat. Erseqqissumillu 'aap'-imik imaluunniit 'naagga'-mik Namminersorlutik Oqartussanit oqaaseqaateqartoqarnissaa inuussutissarsiortunit piumasarineqarpoq. Pisariaqavissappat 'immaqa' akissutigineqarsinnaavoq. Namminersorlutik Oqartussat sapaatit akunneri arfinillit qaangiuppata akissuteqarumaartut oqaatigineqarpoq. Ataatsimeersuartoqarneranili oqaatigineqarpoq akissutigineqartut aatsaat sivitsoraangat inuussutissarsiortunit oqaatigineqarpoq.
Namminersorlutik inuussutissarsiortuni pisortat, Kristian Lennert, Brian Buus Niels Thomsinilu tamarmik isumaqarput pisortat suleqatigiilluarnerusariaqartut.
Kommunit sukkanerusumik sulisariaqartut
Naalakkersuisoqarfiup sullissinera isornartorsiorneqarmat, inuussutissarsiornermut naalakkersuisup kommunip namminersorlutik oqartussallu iluanni equngasoqartoq nassuerutigaa.
Tassungalu tunngatillugu, namminersorlutik inuussutissarsiortut tapersersorniarlugit suleqatigiinnerunissaq, oqaloqatigiinnikkut anguneqassasoq, naalakkersuisoq Vittus Qujaukitsoq oqarpoq.