Isornartorsiorneq: Akit assigiisinneqarnerat tuaviuunneqartoq

'Tulluanngitsoq' aamma 'akuersaarneqarsinnaanngitsoq'. Nukissiornermut aaqqissuusseqqinnermut tusarniaanermi akissuteqaatit ilaat taama ersaritsigipput.

Innaallagissap aamma erngup assigiimmik akeqalersinneqarnerat pilersaarummik eqqartorneqarnerpaavoq. Kisianni piviusumik annertunerujussuuvoq, tassami nukissiornermi nutarsaasoqarami aamma mingutsitsinngitsumik atuinerulernissamut tunngassuteqarami.

Nukissiornermik imermillu pilersuinermut pilersaarut 2030-p tungaanut atuutissaaq. Tusarniaanermulli piffissaliussaq taamaallaat oktobarip 27-annit novembarip 13-iannut sivisussuseqarpoq.

Sapaatip-akunneri sisamat malittarisassaavoq
Qitiusumik ingerlatsisoqarfiup ilaata aamma tamanna sivikippallaarsoraat.

- Tusarniaanermut sapaatip-akunnerini marlunnik weekendimillu ataatsimik sivisussuseqartoq nalunaarutigineqartoq, pisortat tusarniaasarnerannut tunngatillugu aamma sammineqartut inuiaqatigiinnut annertuumik sunniuteqarneranut sanilliullugu tulluanngitsoq naggataatigut naalakkersuisoqarfiup uparuarpaa, Aningaasaqarnermut Naalakkersuisoqarfik akissummini allappoq.

Kommunqarfik Sermersooq aamma isornartorsiorpoq.

- Tusarniaanerit taamaattut sivikitsumik tuaviuussamik piffissalerlugit suliarineqartarneri akuersaarneqarsinnaanngitsoq, kommunip naggataatigut uparuarpaa.

Nalunaarusiaq 100-nik quppernilik
Tusarniaanermut killiliussap siunnersuutip katitigaaneranut tulluarsarneqartarnissaa, Namminersorlutik Oqartussat malittarisassaani atuarneqarsinnaavoq. Taamaalilluni suliani pisariusuni tusarniaanermut sapaatip-akunnerini sisamanit killiliunneqartartunit sivisunerusartussaalluni.

- Tusarniaassutigineqartoq nalunaarusiamik 100-nik qupperneqartumik, sulianut kommunip innuttaasuinut, nunap attaveqatigiinneranut, inuussutissarsiornerup ineriartorneranut aamma ukiorpassuarni tulliuttuni pisuussutit agguaanneqarnerinut annertuumik kinguneqartussaavoq, qitiusumik peqataasut pilersaarutip siunnersuutai sukkatsinneqaratik misissorlugillu suliareqqaartarnissaat piffissaqannginnerat tulluanngilaq, Kommuneqarfik Sermersooq allappoq.

Sapaatip-akunnerini marlunni tusarniaaneq taamaallaat naalakkersuisoqarfiit iluini siunnersuutinut tusarniaanernut aatsaat atorneqartarnissaat oqaatigineqarpoq.

Aamma atuaruk: Ilisimasalik: Akit assigiisinneqarnerinut akiligassaq kingusinnerusukkut takkutissaaq