- Isorartuumut unamminissara qilanaarivara

Martin Møller nuallulluni unamminermi siullermi peqataasinnaanani OL aallartinnerloriarlugu, piumasassuseqaqqilerluarsimavoq. Aqagumi isortartuumut ujakkaartoqartussaavoq, tassa 50 kilometerimut klassiskertoqassaaq.

- Piareersimasutut misigisimavunga. Ulluni kingullerni sungiusarluarnissara qasuersaarnissaralu periarfissaqarfigisimavara, taanna Sermitsiaq.AG-mut oqarpoq.

- Timikkut piareersimavunga, aamma nerilluarnikuullungalu imerluarnikuuvunga, taamaammat piareersimavunga, unamminissaq aqaguttoq, Pyeongchangimit oqaatigineqarpoq.

Takisuumut arpaliuttussat ikittut

50 kilometeri Martin Møllerip unammissutigissallugu nuannarinerpaavaa, taamaammat aqagu sisoraatimi atorluarnissai qilanaareqaa.

- Isorartuumut pitsaanerpaat unammeqatiginissaat qilanaarivara. Nunanimi allani 50 kilometerimut sukkaniunnerit ikittuaraapput.

Eqqarsartaatsikkut piareersarneq

Kisianni qanorluunniit sungiusarluartigisimangaluaraanni isorartuumulluunniit misilittangaqaraluaraluaraanni, ataaseq qularutissaanngilaq:

- Sakkortussaaq.

Martin Møllerip, isorartuup isorartuupilussuartut misinnannginnissaanut akunnerillu marluk missaat sivisuallaannginnissaannut, sakkuaraqarpoq.

- Ingerlaartillunga sisoraatikka marloriarlunga taarsersinnaavakka, taamaaliussaanga eqqarsaatinnilu isorartussuseq pingajorartinngorlugu, taanna oqarpoq.

Angusarinnerpaat 50-it akornanniinnissaq anguniangaasoq

Aqagu sukkaniunnissaq Martin Møllerip ukiuni kingullerni sisamani pimoorussilluni sungiusartarsimavaa.

- Sakkortunerpaasussaavoq, pissaganngilangali. Ujakkaartussaatillunga pissangasimanera qanganngorpoq. Naatsorsuutit aamma piviusorsiortuusarisaqarput.

Ukiut sisamat matuma siorna Martin Møller peqataasuni 60-ni 45-itut apuussimavoq. Taamanikkulli 50 kilometerimoorneq fri stil-iusimavoq. Ukioq mannali peqataasut 71-iussapput.

- Angusarinnerpaat 50-it akornanniissinnaassanguma nuannaassaqaanga.

Soorlu nukappiaqqatut

Sakkortussangaluaqisorli, ingerlaarnerup nuannersortaqarumaarnera Martin Møllerip qilanaaraa.

- Ingerlaarluartilluni nuannertarpoq. Pingaartumik allat ilungersortut qaangersinnaallugit takusinnaangaanni.

- Allaaneq ajorpoq nukappiaqqat oqilanniukkaangata.

50 kilometerimut isorartutigisumut klassiskerneq arfininngornermi Nunatta nalunaaqutaa malillugu 02.00 aallartissaaq.