Toqutsisoqarsimaneranut paasiniaaneq
Islandip præsidentia: Isummat pigiliutiinnakkat sissuerlugit
Islandip præsidentia Guðni Jóhannesson Birna Brjándóttirs ilaqutaanut qaningisaanullu misiginneqataavoq.Silatusaarnissamullu kaammattuilluni.
Islandip præsidentia Guðni Jóhannesson Birnap ilaqutaanut ikinngutaanullu kiisalu suliamut attuumassuteqartunut misiginneqataalluni allagaqartoq Iceland Monitor allaaserisaqarpoq.
Islandimilu innuttani asissueqqunagit pasilleqqunagillu aamma kaammattorpai. Kalaallit tikilluaqqusaanatik toqqissisimanatillu misigitinneqarsimaneri amerlanngitsut nalunaarutigineqarsimasut aamma paasissutissiissutigaa.
Paasiniaanermi aqutsisoq: Ikinngutivut kalaallit pissuserissaarfigisigit
Paasiniaanermi aqutsisoq Grímur Grímsson isumaqataavoq.
- Kalaallit Nunaat pinerluuteqarsimanermi pasineqanngilaq. Kalaallit Nunaat nunaavoq ikinngutitut isigisarput, kalaallillu aamma taamatut isigisariaqarpavut, Grímur Grímsson RUV-mut oqarpoq.
Vittus: Ernumanissaq pisariaqanngilaq
Nunanut allanut tunngasunut naalakkersuisoqarfimmi kalaallit pissusiluffigineqarsimanerinik erseqqissumik tusagaqartoqarsimanngilaq.
- Islandimi pisoq sammineqangaatsiarpoq, eqqumaffigineqarneralu pissusissamisoorluni. Polar Nanumi inuttanut kalaaleqatitsinnut Reykjavikkimiittunut pisoq nuannerunnanngilaq, nunanut allanut tunngasunut naalakkersoq Vittus Qujaukitsoq Sermitsiaq.AG-mut allagaqarpoq
Taanna aamma silatusaaqqusivoq.
- Pingaaruteqarpoq pisumi erloqinartumi ernumalissannginnatta, allappoq.
Nunanut allanut tunngasunut pisortaqarfiup danskit Reykjavikkimi aallartitaqarfiat pisumi attaveqaqatigiilluartut aamma oqaatigaa. Tassanili kalaallinit nuanninngitsunik misillersimasunik saaffiginnittoqarsimannginnerarlugu.
Polar Nanumili inuttanut qanigisaasut nunanut allanut tunngasunut pisortaqarfimmut saaffiginnittarsimasut inuttat toqqissisimannginnerarlugit oqaatigalugu