Island
Islandip Nunatsinnut ataqatigiinneq nukittorsarniarpaa
Naalakkersuisut siulittaasuata Kim Kielsenip Islandip præsidentia Gudni Th. Johannesson naapippaa
Naalakkersuisunut siulittaasup Kim Kielsenip (S) Islandip præsidentia Gudni Th. Johannesson Islandimi præsidentip illorsuani Bessastadirimi ataasinngormat naapippaa.
Gudni Th. Johannessonip oqaatigaa nunatta Islandillu akornanni niuernikkut, kulturikkut angallannikkut allatigullu pitsaasumik suleqatigiinnerit suli pitsanngorsarnissaat anguniarusukkini, Namminersorlutik Oqartussat tusagassiuutinut nalunaarummi allapput.
- Naalakkersuisunut siulittaasup Kim Kielsenip siorna aasakkut Uummannap eqqaani ajunaarnerup kingorna Islandimiut ikiuulluarsimanerat pillugit qujassuteqarpoq, taavalu Nuugaatsiami Illorsuarnilu innuttaasut nunaqarfimminnit qimarngunneqarsimasut ikiorniarlugit suliniutigineqartut pillugit paasissutissiilluni, Namminersorlutik Oqartussat nalunaarput.
Kim Kielsenip aamma Islandip ministeriunera, Katrín Jakobsdóttir, Islandimiinnermini naapissavaa.