aningaasaqarneq
Islandip akiitsuni milliardillit siusinaarluni akilerai
Kiffartuussinermik suliaqarfimmi aalisarnermilu siuariartupiloortoqarneratigut qeqertaq sanilerisarput aningaasaqarnikkut siuariarujussuarpoq
Islandimi aningaasaqarneq ukiualuit matuma siorna, 2008-mi, ajorluinnartumik inissisimalerpoq. Aningaaseriviit ajalusoornerisa soraarsitsiortornersuillu kingorna innuttaasut qeqertaq qimallugu piffissami sivisuumi nutserarput.
Qeqertaq innermik anitsisartoqarfiusoq taamani 13 milliarder koruunit sinnerlugit nalilinnik Den Internationale Valutafondimit, IMF-imit, taarsigassarsivoq.
Taarsigassarsiat taakkua Islandimi aningaaseriviit pingaarnersaata naafferartumik akilersuutit kingulliit 2,2 milliardiusut atorlugit ullumi naammassillugit akilerpai.
Taama nittartagaq inuussutissarsiornermut tunngasunik sammisalik Finans allappoq.
Finansimi atuaruk: Island har betalt sin milliardgæld til IMF
Islandimi maannakkorpiaq ilumoortumik siuariartupiloorneqarpoq. Avammut niuernermi tikisitsisarnermilu naatsorsuutit suliaqarfimmit ataasiinnarmit isertitat tunngavigalugit siorna oqimaaqatigiilerput, tassa takornariaqarnermit. Ukioq taanna qeqertaq perngaammik 1 million sinnerlugit takornariaqarpoq.
Aningaasaqarnikkut pissutsit pitsanngoriarnerisa kingunerannik Islandip akiitsuni piffissaq sioqqullugu akilersinnaanngorsimavai, tassa IMF-imit taarsigassarsiat aammali taarsigassarsiat allat ilaatigut Savalimmiunit, Danmarkimit nunallu avannarliit sinnerinit Polenimillu pisut.
Akiitsut katillugit 14,7 milliarder koruunit ukiut pingasut ingerlaneranni utertillugit akilerneqartut.
Island pillugu atuakkit:
Siunnersuisoqatigiiffik aalisarnermi suleqatigiinnissamik kaammattuuteqartoq
Det skal være lettere at handle med fødevarer