Islandimiut skakkertartut Nuummi skakkertitseqqissasut

Islandimi skakkertartut peqatigiiffiat Hrókurinn Jonathan Motzfeldt eqqaaniarlugu skakkimik pikialaartitsissaaq.

Maajip 15-nit 19-at ilanngullugu skakkimik unammisaqattaartoqassalluni.

Skakkimik unammiuaarnerit arlalissuit ingerlanneqassapput atuarfiit meeqqeriviillu aamma pulaarneqassallutik.

Jonathan Motzfeldtiugaluaq (1938-2010) Kalaallit Nunaata oqaluttuarisaanerani nunat tamat akornanni skakkimik unammiuaarnerit siullersaanni peqataavoq. Unammiuaarnerit 2003-mi Qaqortumi Hrókurinnimit aaqqissuunneqarput. Kingorna Hrókurinn 30-t sinnerlugit Kalaallit Nunaannut tikeraartarpoq meeqqat inersimasullu skakkimik ilinniartinniarlugit nunallu eqqaamioriit akornanni ikinngutigiinneq nukittorsarniarlugu.

Ataatsimoorluta nukittuneruvugut
Ukioq manna skakkimik pilialaartitsinermi oqariartaatigineqarpoq 'Ataatsimoorluta nukittuneruvugut', Qaqortumi skakkimik unammiuaarnerit naggataarneranni Jonathan Motzfeldtip oqaaserisaattut. Oqaatsit taakkorpiaat Hrókurinnip Kalaallu suleqatigiinnerminni tunaartaraat.

Hrókurinnip ilaasortaanut ataqqinaataallunilu nuannersuuvoq Islandip ikinngutaa sunngiffimminilu skakkertartoq Jonathan Motzfeldt eqqaaniarlugu skakkernermik pikialaartitsisinnaaneq. Aamma Islandimiit tikeqataassapput Reykjavikimi atuarfimmi Rimaskolimi skakkeqatigiittartut arlaleriarlutik nunani avannarlerni unamminerni pissartaasartut, skakkilu ulluinnarni atuarfimmi tassani pingaarluinnartuuvoq.

Aamma skakkimik pissartat allat utoqqasaat tikissapput pikialaarnermi peqataallutik. Peqataasut utoqqaanersaata inuusunnersaatalu ukiumikkut nikingassutigaat ukiut 70-it, taamaalilluni uppernarsineqarluni skakki tamanut tunngasuusoq. Aamma Hrókurinnimit neriuutigineqarpoq kalaallit skakkertartorpassuit peqataajartorumaartut.

Hrókurinn atuarfinnut, meeqqerivinnut, utoqqaat illuinut napparsimmavimmullu pulaassaaq. Aamma Nuuk Centerimi soqutiginnittunut aaqqissuussisoqassaaq:

Nuuk Centerimi pilersaarut

Arfininngorneq maajip 17-ani nal. 13:00
Jonathan Motzfeldt eqqaaniarlugu skakkimik unammiuaarneq.Unammiuaarnerit qulit ingerlanneqassapput tamarmik minutsini tallimani eqqarsarfissaqartarluni.Akeqaranilu kikkut tamarmik tikilluaqqusaapput.

Sapaat maajip 18-ani nal. 14:00
Sukkasuumik skakkernermi Nuummi pissartanngorniunneq.
Unammiuaarnerit qulit ingerlanneqassapput tamarmik minutsini tallimani eqqarsarfissaqartarluni.
Akeqaranilu kikkut tamarmik tikilluaqqusaapput.

Skakkimik unammiuaarnermi immikkut qaaqqusaalluni peqqataassaaq Islandimi nunanut allanut ministeriusimasoq maannakkullu Altingimi ilaasortaq Dr. Össur Skarphédinsson.

Dr. Skarphédinsson aamma 2003-mi Qaqortumi unammiuaarnermi peqataavoq kiisalu 2004-mi Tasiilami unammiuaarnersuarmi.