Islandimiut periusaat meeqqanut atornerluisarnermut atorneqassaaq

Siornatigut oqaluttuareriikkatsitut 15-16-nik ukiullit imigassartortarnerisa unitsinnissaa Islandimi iluatsinneqarnikuuvoq.

Kisianni ukiuni 20-ni suliniuteqarnerup imigassartortarneq kisiat akiorsimanngilaa, aamma pujortarneq, hashitorneq, qinngasaarisarneq atornerluisarnerlu uppernarsarneqarsinnaasumik kinguneqarpoq.

Periuseq maluginiarneqartoq
Sapaatip-akunnerata siuliani isumaginninnermut naalakkersisoqarfimmi sulisut marluk Islandimut tikeraarlutik periuseq taanna ilikkagaqarfigiartorpaat. Taakkulu naliliinerat pitsaasuuvoq.

- Suleqatigalu Islandimi takusatta, Islandimiut periusaannik taagorneqartoq inuiaqatigiinni pissutsinut naleqqussarutsigu Nunatsinni atorneqarsinnaasoq uppernarsarpaa, Maliina Junge Jørgensen oqarpoq, taanna qitiusumik siunnersuisoqarfimmi fuldmægtigiuvoq.

Atornerluinermut tunngasoq suliarigaat
Taassuma suleqataatalu kinguaassiutitigut atornerluinermut tunngasortaa suliaraat. Tassunga atatillugu Islandimi periuseq tusagaqarfigineruniarlugu Islandimut tikeraarput. Sapaatip-akunnerani uani inuiaqatigiinni kinguaassiutitigut atornerluinernut tunngasunik suliaqarnermut peqataasunut gruppimut suliarinnittussanut saqqummiuppaat.

- Suliarinnittussat atornernerluinermut suleriaasissaq pillugu suliarinnittussanik paasiniaaqatigiisitsivugut, tassani pinaveersaartitsineq sammisat ilagaat. Tassani ilaatigut 'Islandimiut periusaat' saqqummiupparput, Maliina Junge Jørgensen oqaluttuarpoq.

Meeqqap inuunera pillugu apeqqutit 80-t
Islandimiut periusaata ajornartorsiuterpassuit pinaveersaartissinnaanerinut, spørgeskemamik annertuumik meeqqat qanoq atugaqarnerinik atuarfinni tamani misissuinermik pissuteqarpoq.

Apeqqutit 80-t missaaniittunik meeqqap inuunera tamarmi qulaajarneqartarpoq. Apeqqutit najukkamut naleqqussarlugit ilaneqarsinnaapput. Sapaatip-akunnerisa arfineq-pingasut ingerlanerini misissuinerup inernera piareertarpoq, tassani nalorninartoqarfiusut tikkuartorneqartarput. Nalorninartorsiorfiusut aallaavigalugit ajornartorsiutit ineriartunnginnerini qisuariartoqarsinnaavoq.

- Paasiniaaqatigiinnermi periutsip suliarinerata ingerlateqqinneqarnissaanut tapersersuineq annertuvoq. Tamanna aammalu erseqqissumik tunngaveqarluni angajoqqaat ilaquttallu ilanngunneqarnissaasa pingaartinneqarnissaat tigulluarneqartorujussuuvoq, Maliina Junge Jørgensen nassuiaavoq.

Misileraanissaq isumaliutigineqartoq
Tassami suliniummi angajoqqaat inuiaqatigiillu ilanngunneqarnissaat alloriarnissamut tulliuvoq, tassani misissuinermi nalorninartut takuneqartut pinngitsoortinniarneqassallutik.

Tassunga tunngatillugu paasiniaaqatigiinnermi tigulluarneqarpoq.

- Kinguaassiutitigut atornerluisarnermut periusissiamut Islandimiut periusaat ilanngunniarlugu maanna isumaliutigisorujussuuarput. Suliniummik suliaqartunit, aqutsisuniillu taperserneqassappat, taava ilanngullugu suliarineqarnissaanut isumaliuteqartoqassaaq.

Sumiiffimmi ataatsimi misissuinerup aallartinneqarnissaa tassanngaanniillu misilittakkanik katersisoqarnissaa isumassarsiaasoq, Maliina Junge Jørgensen nassuiaavoq.

- Illoqarfimmi ataatsimi misiliinermik aallartissinnaalluta takorloorparput, tassani spørgeskemanik misissuilluta. Taassuma kingorna illoqarfimmiut peqatigalugit qanoq iliortoqarsinnaaneranik suliaqarsinnaavugut. Inuit illoqarfimmi nukittulluartut ilanngunneqarnissaat sulinermi qitiussaaq. Periuseq kalaallinut inuiaqatigiinnut tulluarsarneqarnissaat pingaarnerpaassaaq.

Islandimiut periusaat pillugu uani paasisaqarnerusinnaavutit:

Ukiuni 20-ni suliniut: Inussuttut ernguttarneri Islandip iliuuseqarfingilluarsimavai

Islandimit kajumissaarut: Atuarfinni tamani meeqqat qanoq innersut misissorsigit