suleqatigiinneq

Islandimit nioqqutissanik eqquissuineq ajornannginnerulissaaq

Mittarfeqarfiit Air Icelandilu assartuinermik isumaqatigiissuteqarput siunissami assigiinngitsutigut iluaqutaasinnaasumik

Mittarfeqarfiit aamma Air Iceland Cargo ataatsimoorlutik Kalaallit Nunaannut nioqqutissanik eqquissuineq sapernannginnerulersinniarpaat. Ingerlatseqatigiiffiit taakku marluk akornanni marlunnik suleqatigiinnissamut isumaqatigiissutaat ajornannginnerusumik assartuisoqartalernissaanik kinguneqassapput, aammattaaq Kalaallit Nunaanni mittarfinni sisamaasuni assartuinermik suliaat pitsaanerusumik ingerlalissapput.

Mittarfeqarfiit tusagassiutinut nalunaaruteqarpoq.

Mittarfeqarfiit mittarfiat Mittarfik Kulusuk Air Icelandimit periarfissinneqarpoq de-icerimik sermernaveersaammik atornissaminik, taanna aamma timmisartut allat Air Icelandimeersuunngitsut atorsinnaalerpaat.

Tamanna Mittarfeqarfiit Air Icelandillu akornanni mittarfinni atortut pillugit suleqatigiinnissamik nutaamik isumaqatigiissusiornerup kinguneraa. Tamassuma kingunerisussaassavaa timmissartut ikinnerusut kinguaattoortarnerat. Aammattaaq ´ground handling´ nunami iliuuserisartakkanik isumaqatigiissuteqarnikkut assartukkanut passusseriaatsinik nutaanik aaqqissuussusisoqartalissaaq, taamaattoqarneratigut Kalaallit Nunaannut nioqqutissanik pisariinnerusumik eqqussisoqartalissalluni avammullu annissisoqarsinnaalerluni.

Air Icelandip cargo manageria Vigfús Vigfússonip isumaqatigiittoqarnera ilaatigut ima oqaaseqarfigaa:

- Nunanut allanut assigiinngitsunik angissusilinnik avammut assartuisalernissarput ajornannginnerulissaaq, tassalu ilaatigut kingunerissavaa inuussutissanik assartuisarneq pisariinnerulissammat.

Suleqatigiinneq pingaaruteqartoq
Sermernaveersaatip ukioru tikittussap saniatigut, aamma assartuinermik suleqatigiinnerulernissap

saniatigut isumaqatigiissutit makku imarai:

  • Air Icelandip Mittarfeqarfiit assartugalerinermik sulisuisa ilinniartinnerat isumagisassavaa
  • Air Icelandip Mittarfeqarfiillu akornanni akinik nutaanik aaqqissuussineq, pisariinnerusumik akileeqatigiittarneq anguniarlugu
  • Nuummi mittarfimmi nioqqutissanut nutaanut qerititsiveqalernissaq
  • Air Icelandimit teknikkikkut atortunik assigiinngitsunik Nuup Ilulissallu mittarfiinut pilersuineq

- Mittarfeqarfiit taamatut arlalinnik assingusunillu assartuinermik isumaqatigiissuteqareerpoq, namminnerlu Kalaallit Nunanni mittarfinni suliat annertunerpaartaat ingerlataraat, taamaattumik isumaqatigiissut maanna isumaqatigiissutaasoq takornartaanngilaq. Nutaartaavoq suleqatigiinnerup annertussusaa, aammalu qanimut mittarfinni teknikkikkut atortut pillugit isumaqatigiikkatta, neriuutigaarpullu aamma nutaanik suliffissanik pilersitsiffiujumaartoq, Mittarfeqarfiit attaveqatigiinnermi ingerlatsisua Hans Henrik Lichtenberg oqarpoq.

Powered by Labrador CMS