Islandimiit isigalugu: Nunarsuarmi sumiiffinni politikkimi piviusut Kalaallit Nunaata akuerisariaqarpai
Kalaallit Nunaat namminersulivikkaluaruniluunniit Kinamiit aningaasaliiffigineqarnissamik ajornartorsiulersinnaasoq, Islandimiu immikkut ilisimasalik naliliivoq
Namminersulivinnissaq ilisimaneqartutut qineqqusaarnermi sammineqangaatsiarpoq. Sammisarlu taannarpiaq Islandimi aamma soqutigineqarpoq, taakkumi 1944-mi Danmarkimiit avissaarput.
Island namminerisaminik illersornissamut sakkutooqanngilaq taamaallaat sineriammik nakkutilliisoqarluni. Illuanilli NATO-mi ilaasortaavoq illersornissarlu pillugu USA-mut isumaqatigiissuteqarluni.
Pissaanilissuanut inissisimaffik tunngavigalugu Kalaallit Nunaat Islandimiit annertunerusumik pingaaruteqarpoq.
Kalaallit Nunaat namminersulivissimasoq USA-mut NATO-mulluunniit aamma illersornissamut isumaqatigiissuteqassaguni taava qanorluunniit iliorsinnaajunnaassaaq. Damien Degeorges, ph.d. aamma Reykjavikimi siunnersorti Nunatsinni ineriartornermik ukiut 15-it sinnerlugit malinnaasimasoq, taama naliliivoq.
- Island qiviaraanni illersornissakkut USA-mik NATO-millu pinngitsuuisinnaanngimmat oqartoqarsinnaavoq Kalaallit Nunaanni ineriartornermi Kalaallit Nunaannit akuerineqartariaqarpoq avaqqunneqarsinnaanngitsumik nunarsuarmi inissisimaffik tunngavigalugu politikkikkut pingaaruteqartoq. Taamaammat Kinamiut Kalaallit Nunaanni aningaasalersuinissaat akueriinnarneqarsinnaanngilaq, uffa Asiami nunat allat, Europamiiut Amerikallu avannaamiut akuerineqarsinnaasut, Damien Degeorges Sermitsiaq.AG-mut oqarpoq.
Tikkuagaasa ilagaat Kinamiut mittarfinnut aningaasaleeqataaniarnerat amerikamiunit ippigineqarsinnaasoq. Damien Degeorgesip erseqqissarpaa, aningaasaliinissat uani kisimik pineqartut, taamaattumik Kinamik niueqateqarnissaq akornutissaqartinnagu.