Island VM-imut suli neriuutissaqarpoq

Reykjavikimi Kroatiamut isertitsiffiunngitsumik unamminermi islandimiut anisitaasoqarput

Luka Modric Kroatiamiu aamma Gylfi Sigurdsson, Islandimiu.

Tallimanngormat arsaalluni VM-imut anngunniulluni playoff-imi unamminermi Islandimi ingerlanneqartumi Olafur Ingi Skulason unamminerup immikkoortuata aappaa aallartiinnangajattoq anisitaavoq.
Anisitaaneq qularnartulerujussuaq pissutigalugu Islandip nunanut allanut unammisartut sungiusaasuata Lars Lagerbäckip kingorna dommeri isornartorsiorpaa.
– TV-kut takuteqqinneqarnera ilaasa takusimavaat, oqarpullu anisitsineq qularnartulerujussuusoq. Anisitsinerli kisimiinngilaq, pisuni amerlasuuni dommeri nalornisarpoq siggassanerluni imaluunniit unammineq ingerlatiinnassanerlugu.
– Unammisartukka unammilluartorujussuupput, dommerili pitsaanerpaamik ulloqanngilaq, NTB malillugu Lars Lagerbäck tv-qarfimmut RUV-mut oqarpoq.
Olafur Ingi Skulason, siusinnerusukkut Sønderjyskemi unammisartuusimasoq, anisitaavoq kinguarsimasumi kingullersaalluni kroatiamiu Perisic straffertarfiup avatinnguani uppitikkamiuk.
Islandimiut ataatsimik ikinnerugaluarlutik angerlarsimaffimminni ilimagineqartunut 0-0-mik angusaqarput, tamannalu sungiusaasup nuannaarutigaa.
– Ataatsimik ikinnerulluta minutsini 45-ni illersorluaqaagut - oqaasissaqartinngilara unammisartukka qanoq iliorsimanersut, Lars Lagerbäck oqarpoq.
Marlunngorpat Zagreb-imi aappassaanik unamminissami Island anngutissaguni naalagaaffiit oqaluttuarisaanermi arsaannermi VM-imut annguttut minnersarissavaat.

Powered by Labrador CMS