Nunap sajunneranit eqqugaasut
Island Nunatsinnut ikiuunnissaminik neqerooruteqartoq
Islandimi Naalakkersuisut sinnerlugit Nunanut Allanut Ministerip pisumut ernumanini misiginneqataaninilu apuuppaa, pisariaqartinneqarpallu Island Kalaallit Nunaannut ikiuunnissaminut piareersimanera ilisimatitsissutigalugu.
- Ullumi nunanut allanut Naalakkersuisoqatiga Suka K. Frederiksen oqaluuppara Island Kalaallit Nunaannik tapersersuinera apuullugu, pisariaqartinneqassappallu ikiuunnissaminut piareersimalluta, Gudlaugur Thór Thórdarson tusagassiuutinut nalunaarutaa aallavigalugu Naalakkersuisunit nassiunneqartumi taama oqarpoq.
Tamanna pilugu Nunanut Allanut Naalakkersuisoq Suka K. Frederiksen ima oqaaseqarpoq:
- Islandimi Nunanut Allanut Naalakkersuisooqatimma ullumikkut sianernera qujamasuutigaara, tuppallernarpoq Islandimi Naalakkersuisut innuttaasullu pisumi immikkut isumalluutinik ikiuunnissamillu pisariaqartitsigutta neqerooruteqarnerat. Qanittumik attaveqarneq ikinnguteqarnerlu paasillugu pitsaavoq, piffissanilu ilungersuanartorsiorfiusuni sanilerisanik pitsaasumik attaveqarneq ersersinneqarpoq.
Nunanit allamiunik ajunaarnermit eqqugaasoqanngitsoq
Suka K. Frederiksen-ittaaq ilisimatitsissutigaa sumiiffinni eqqugaanerpaaffiusuni nuanit allanit innuttaassusilinnik takornarianilluunnit maannamut akuusoqarneranik ilisimatitsisoqarsimanngitsoq, Islandimiillu ilisimatitsissutit Naalakkersuisunut tamanut apuunneqareersoq ilisimatitsissutigalugu.