Island Gamesimi ujammit amerlanerusut pissarsiarineqarnissaat GIF-imit piumasarineqarpoq

Kuulti ataaseq, sølvit marluk bronzelu ataaseq.

Kalaallit Nunaata Bermudami 2013-mi Island Gameseqataanerani taakku ujaminnattaarineqarput. Angusarineqartut pitsaanerulernissaat Timersoqatigiit Kattuffianit piumasarineqarpoq aasaru Jerseymi Island Gamesertoqarnerani.

- Island Games unammisartutut ineriartornissamut atorluarneqarsinnaavoq, timersuutimmi ilaat timersuutit allanit angusarissaarnerusarput. Taamaattumik takorloorparput unammisartut pisinnaasartik tamaat atorlugu angusarissaarniassasut, angusatimmi atorlugit unammersuaarnernut anginerusunut Island Games ikaarsaariaatitut atorniassammassut, Timersoqatigiit Kattuffianni siulittaasoq Nuka Kleemann oqarpoq.

- Piumasaqaataassaarli nunanut allanut unammisartuunissaq, ullullu tamaasa sungiusarneq pimoorullugu, qasujaallisarneq, nukkassarneq, teknik-ikkullu piginnaasat pitsanngornissaat, siulittaasup tusagassiutinut nalunaarummi oqaatigaa.

Timersortartut 106-t ukioq manna peqataassapput
Nunarput Island Games 2013-mi unammisartunik 84-nik aallartitaqarpoq, timersuutit assigiinngitsut arfineq marlunninngaanneersunit. Katillugillu ujammit sisamat angusarineqarput, tassaasut: Badminton angutit iligiikkaani kuultinnapput Taatsiannguaq Pedersen aamma Jens Frederik Nielsen, isikkamik arsaattartut arnat angutillu sølvinnapput, minnerunngitsumillu volleyballertartut arnartai bronzennallutik.

timersortartut nunatsinneersut 106-it, timersuutini qulingiluaasuni nalunaareerput peqataanissaminnut. Ukioq manna nunatsinnit peqataasunit unammiffigineqassapput: atletikki, sulorarneq, nerrivimmi arsaararneq, sikkilerneq, isikkamik arsaanneq, golfi, eqqarneq, triatlon aamma volleyball.

Ukioq allortarlugu Island Games ingerlanneqartarpoq. Tuluit qeqertaasa ilaanni, Jersey-mi, juunip 27-anit juulip pingajuat ilanngullugu ukioq manna ingerlanneqassaaq.