Island Gamesimi kalaallit angusaat aajuku

Kalaallit timersortartut Island Gamesimut peqataasut arlallit marlunngornermi unammipput.

Sermitsiaq.AG-p allareerneratut angutit isikkammik arsaattartut Gotlandimut ajugaareerlutik semifinalertussanngorput. Taakku aqagu sisamanngornermi Menorca semifinalimi unammissavaat.

Arnat isikkammik arsaattartut semifinalersinnaajunnaareerput. Taakku pingasunngornermi naggataarlutik unammissapput.

Ajugaasorpassuit
Marlunngornermi arnat volleyballertartut marloriarlutik unammipput. Unamminermi siullermi Gibraltar unammivaa. Kalaallit Nunaat tassani 3-1-mik ajugaavoq. Unamminerup aappaani Ålandimut 1-3-mik ajorsarlutik.

Angutit pissanganartumik unammereerlutik Guernseymut ajugaapput.

Golfertartut aamma unammipput. Unamminerup immikkoortuani siullermi Lars Karl Johansson 55-itut inissisimagallarpoq, Simon Westermannilu 57-iulluni.

Ataasiakkaarluni sulorarluni unamminerit aallartereerput.

Pingasunngornermi unamminerit sioqqullugit ima inissisimapput:

Angutit ataasiakkaarnerat:

• Sequssuna Fl. Schmidt (1/16-mut ingerlaqqippoq)
• Jens Frederik Nielsen (1/16-mut ingerlaqqippoq)
• Toke Ketwa-Driefer (1/16-mut ingerlaqqippoq)

Arnat ataasiakkaarnerat:

• Sara Lindskov-Jakobsen (1/16-mut ingerlaqqippoq)
• Pilunnguaq Hegelund (1/16-mut ingerlaqqippoq)
• Paninnguaq Davidsen (1/16-mut ingerlaqqinngilaq)
• Malu Degn (1/16-mut ingerlaqqinngilaq)

Angutit marlukkaarnerat:

• Bror Madsen/Jens Frederik (1/16-imi pingasunngorpat unammissapput)
• Frederik Elsner/ Sequssuna Fl. Schmidt (1/16-mut ingerlaqqipput)
• Arnat marlukkaarnerat (pingasunngornermi aatsaat unammissapput)

Arnat angutillu iligiikkaarnerat:

• Sequssuna Fl. Schmidt/Paninnguaq Davidsen (1/32-mut ingerlaqqipput)
• Jens frederik Nielsen/Milka Brønlund (1/32-mut ingerlaqqipput)