Arsaannermi EM
Island ajugaanngikkuni peersitaassaaq
Arsaalluni EM-imi ualeru ottendedelsfinalernermi Island Tuluit Nunaallu ingerlaqqinniutissapput
Ataasinngornermi ualikkut nunatta nalunaaqutaa malillugu nalunaaqutaq 17, Island aamma Tuluit Nunaat arsaalluni Europami pissartanngorniunnermi ottendedelsfinalimi unammissapput, kvartfinalimut anngunniullutik.
Arsaalluni EM-eqarnermi unammisarnerminni Tuluit unammilluartarsimapput, nunanulli allanut unammisartut sungiusaasup Roy Hodgsonip unammisartui ajugaanissaminnut tamaviaartariaqartarsimapput. Gruppimi unamminerni pingasuinnarnik isertitsinikuupput, ualerulu ottendedelsfinalimi unamminermi Islandimiut pissartanngorniunnermi sukataaqisut, suli unamminerminni ajorsarsimanngitsut, Tuluit ajugaaffiginiarsarigaluassavaat.
Roy Hodgsonip, ajorsarunik Tuluit Nunaanni nunanut allanut unammisartut sungiusaasuattut sungiusaasutut naggataarluni unammisinnaasup, qeqertarmiut gruppespillimit ingerlaqqissinnaasimanerminni qaratsakkut piginnasaqarsimanerat nersualaarpai.
– Qularutiginngilra islandimiut pissutsimikkut aalajaatsuunerat, piumassuseqarluarnerat pissutsinillu ajornartorsiorfiusunik qaangiisinnaassueqarnerat ingerlaqqinnerannut pissutaaqataalluinnarsimasoq.
– Nalunngilarali unamminermi ajugaanissamut ilimagisatut ajugaaffigisariaannartulluunniit isigigaluarutsigik unammineq uagutsinnut tamaviaarnartorujussuussaaq ajugaaffiginiarnissaallu ajornakusuussaqisoq, Reuters naapertorlugu Roy Hodgson oqarpoq.
Akeraanni nunanut allanut unammisartut sungiusaasuata Lars Lagerbäckip neriuutigaa EM-imi naalagaaffiit mikinersaata oqaluttuarisaanertut ingerlalluarnini nangiinnassagaa, Tuluillu ajugaaffigalugit qanoq piginnaassuseqarnerminnut imminnut eqqarsaatersorteqqilerlugit.
– Tuluit unammilluartarsimapput, arsaannermili iseritsineq aalajangiisuusarpoq. Neriuutigaara unammeriaasertik atuinnassagaat, Lars Lagerbäck oqarpoq.
Lägerbeck nalunaareersimavoq EM-ip kingorna Islandimi sungiusaasutut tunuarniarluni.
Roy Hodgson sungiusaasutut ingerlaqqissanersoq ilisimaneqanngilaq, tamannali paasinarsissaaq Islandimut ajorsassagaluaruni.
Wayne Rooney ernumassuteqanngilaq.
– Periarfissanik pilersitsiuaannarutta målertalissaqqaarpugut, tuluit målernikittarnerat pillugu Wayne Rooney oqarpoq.