Island Games
Isikkammik arsaattartunut sungiusaasoq: Pissartanngorsinnaavugut
Isikkammik arsaattartunut nunanut allanut unammisartunut sungiusaasoq, Tekle Ghebrelul, Menorcamut unammeqqinnissamut piareersimavoq
- Menorcamut naligiilluta unamminerput ukiut marluk maanna eqqarsaatiginikuuara, semifinalimilu ajugaaffiginissaannut maanna piareersimavugut.
Angutit isikkammik arsaattartut nunanut allanut unammisartut sungiusaasuat, Tekle Ghebrelul, marlunngornermi Island Gamesimi Gotlandimut ajugaanerup kingorna Sermitsiaq.AG-mut taama oqarpoq, taamaalillutik semifinalimi Menorcamut unammisussanngorput. Aqagu sisamanngornermi unammissapput.
Ukiut marluk matuma siorna Jerseymi Island Gamesertoqarnerani Kalaallit Nunaata Menorca puljeqatigaa.
Akisillutik unammerusuttut
Kalaallit Nunaat taamani unamminerup naammassilernerani 2-0-mik siuaqqavoq, ajugaagunillu finalersinnaagaluarlutik. Menorca kisianni marloriaq isertitsilluni 2-2-mik naligiilersitsipput. Menorca kalaallinit taamaalilluni målimik ataatsimik isertitaqarnerulluni semifinalimut ingerlaqqippoq.
- Unamminissaannut (Menorca, aaqq.) piareersimalluinnarpugut, Tekle Ghebrelul oqarpoq.
Unammisartullu pissartanngorsinnaasut qularinngilaa.
Unammisartut marluk unammeqqusaanngikkallartut
- Unammisartummi nukittuut (Gotland, aaqq.) ajugaaffigeqqammerpagut, tassani unammiuaarnermi aatsaat taama unammilluartigaluta. Taama siusitsigisumi isertitsinianngikkaluarpugut, kisianni unammisartut unamminerup naanissaanut ilungersorput, meterinik arpannerullutik aamma taktikkerluarlutik, sungiusaasoq qiimmatsaqqasoq oqaluttuarpoq.
- Kisianni minutsit 45-t kingulliit takinerpaapput. Piffissap ilaani ilungersortitaavugut, kisianni Gotlandip sukataarnera akerlilerparput, unammisartullu qanoq iliussanerlutik nalunngilaat, taanna erseqqissaavoq.
Unammisartut siuttuat Nukannguaq Zeeb, Gotlandimut unamminermi aappaluttumik nittarsaavigineqartoq, aamma Niels Svane unammiuaarnermi marloriarluni mianersoqqussummik nittaavigineqartoq, unamminermut peqataasinnaanngitsut Tekle Ghebrelul oqarpoq.
- Semifinalimut peqataasinnaannginnerat iligiinnut nukilaallisitsivoq. Kisianni unammisartut unammineq sioqqullugu imminut tatigipput, arsarnissarpullu inissippoq. Menorcamut unamminissamut qilanaarpugut, Tekle Ghebrelul oqarpoq.