Københavnimi toqusoq

Isiginnittoq: Sanioqquttut angut toquinnartariaqarnerarpaat

Ambulance suli takkutinngitsoq, sanioqquasut nilliapput angut kalaaleq angerlarsimaffeqanngitsoq imertarami toquinnartariaqartoq. Taama arnaq angummik ikiueqqaartoq oqaluttuarpoq

Ambulance aamma politiit aggersarneqaqqaarnerminnit 26 minutsit qaangiuttut aatsaat tikiupput

Sermitsiaq.AG-mi allaatigineqareersutut angut kalaaleq 32-nik ukiulik Amagerbro Stationip eqqaani ataasinngormat toquvoq. Angut toquvoq ambulancit pingasoriarluni aggersarneqareeraluartut. Ambulance aamma politiit aggersarneqaqqaarnerminnit 26 minutsit qaangiuttut aatsaat tikiupput.

Atuaruk: Angut 32-nik ukiulik Københavnimi toqusoq

Maanna arnap angummik kalaallimik 32-nik ukiulimmik, angerlarsimaffeqanngitsumillu, ikiueqqaartup Sermitsiaq.AG-mut misigisani oqaluttuarai. Arnap, Ulla Miilmannip, ambulancit aggersakkani minutsini 26-ni utaqqivai.

Ambulancit 3 minutsinik sioqqullugit toquvoq
Ulla Miilmann unnuaq tamaat sinippiarsimanngitsoq Sermitsiaq.AG-mut oqaluttuarpoq angerlartilluni Amagerbro Metromi angut nalasoq takusimallugu.

- Inoqammik ikiortarialimmik naapitsigaanni ikiueqqaarsinnaananilu qanoq ilioriaasissaaleqinartorujussuuvoq. Kisianni suli erloqinerulerpunga ambulance takkunneq ajulermat, Ulla Miilmann Sermitsiaq.AG-mut oqarpoq.

Atuaruk: Politikerip immikkoortitsisoqarsimanissaa ernummatigigaa

- Utaqqilluni assut ajorpoq. Ingasammik ambulancip takkunnissaa minutsinik pingasunik sioqqullugu anernigermat, oqarpoq.

Sanioqquasut: Imertarami toquinnarniarli!
Ulla Miilmannip ilanngullugu oqaluttuaraa inuppassuit angut ikiortariaqaraluartoq sanioqqutaaginnarsimagaat, naak nammineq allallu ikiuutilereeraluartut.

- Sanioqquasut nilliapput nammineq pisuummat toquinnartariaqartoq. Imertarmat, Ulla Miilmann attortissimaqisoq oqaluttuarpoq.

- Neriuppunga inuiaqatigiinni immitsinnut paarinerulerumaartugut, oqarpoq.

Atuaruk: Peqatigiiffiit: Angerlarsimaffeqanngitsut soqutigineqarneq ajorput

Kalaaliuva?
Kisianni sanioqquasut Ulla Miilmannip kisiisa pakatsiffiginngilai. Angummi alarmcentralimut pingasoriarluni sianertoqareeraluartoq toquvoq.

- Angutip eqqaanillunga arnaq ambulancinut sianeqqequara. 20 minutsit qaangiunnerini aamma arnaq alla sianeqqequara. Arnap sianertup kingulliup telefuuni iligamiuk arnaq sianertoq siulleq aperaa aamma aperitissimanersoq angut kalaaliunersoq, Ulla Miilmann tupaallaqqasoq oqarpoq.

- Angerlarpunga misigisimallunga angerlarsimaffeqanngitsut ikiorneqarnissaminnut salliunneqarnerpaajunngitsut, Ulla Miilmann oqarpoq.

Region Hovedstadenimi Akutberedskabip maanna pisoq misissuiffigaa. Sulisut ambulancemik aggersaanermut oqarasuaammik tigusisut, pisut misissuiffigineqarnerani suliunnaarsinneqarallarnerannik kinguneqartinneqartumik.

Atuaruk: Københavnimi toqusoqareersoq oqartussaasut misissuilerput
http://sermitsiaq.ag/kl/koebenhavnimi-toqusoqareersoq-oqartussaasut-misissuilerput

Powered by Labrador CMS