tusagassiuutit
Isiginnaarutinut peqatigiiffik: Peqatigiiffiit akissaarutsinneqassapput
Isiginnaarutikkut akeqanngitsumik timersortunik Naalakkersuisut aningaasanik tapiisalissagaluarpata peqatigiiffiit eqqorneqassasut Nunatsinni Tusagassiuutilerisut Kattuffiata oqaatigaa
Nuna tamakkerlugu timersortunik aallakaatitsisartoq TV3 Sport akeqanngitsumik aallakaatinneqartalernissaa Atassummit siunnersuutigineqarpoq.
Piviusunngussappat tv-qarnikkut peqatigiiffiit annertuumik eqqorneqassasut Nunatsinni Tusagassiuutilerisut Kattuffianit NTK-mi siulittaasup Peter Frederik Lyberthip oqaatigaa.
TV3 Sportip akeqanngitsumik Nunatsinni takutinneqartalernissaa Inatsisartuni ilaasortanit Atassummeersunit Gerhardt Petersenimit Knud Kristiansenimiillu siunnersuutigineqarpoq.
Aningaasat allamut atorneqarnissaat
Piviusunngussappat isiginnaarutikkut soorlu Premier Leaguemi isikkamik arsaattut akeqanngitsumik isiginnaarneqarsinnaanngussapput. Illoqarfinni assigiinngitsuni akiliilluni isiginnaarneqarsinnaapput, soqutigineqarluarpullu.
- Nunani allani isikkamik arsaattut nuannarineqartorujussuupput, taamaattumik siunnersuutigineqartoq piviusunngussappat akileeqqaartariaqarunnaassallutik, tamannalu peqatigiiffinnut annertuumik eqquissalluni, Peter Frederik Lyberth oqarpoq.
Aningaasat allanut atorneqarsinnaasut siunnersuutigaa.
- Nunani allani arsaattut takutinneqarnissaat sooq Namminersorlutik Oqartussat akiliissava? Kalaallit Nunaanni timersortartut peqatigiiffii aningaasassaaleqisorujussuupput. Aningaasat amerlasuut taakkununnga atorneqarnissaat pitsaanerussaaq, Peter Frederik Lyberth oqarpoq.