kulturi
Isiginnaartitsisunngorniarfimmi aqutsisoq paarlanneqartoq
Makka Kleist kingoraarlugu Varste Berndtssonip isiginnaartitsisunngorniarfik aqussavaa
Varste Berndtsson Kalaallit Nunaanni isiginnaartitsisartunngorniarfimmi pisortanngussaaq. Tamanna Nunatta Isiginnaartitsisarfiata Nuumiittup saqqummiuteqqammerpaa.
Varste M Berndtsson 1993-imi Tuukkaq Teaterimi isiginnaartitsisartutut ilinniarsimavoq Ilisimatusarfimmilu kultureqarnermut inuiaqatigiillu oqaluttuarisaanerannut bacheloritut ilinniarsimalluni.
Assit takukkit: Nunatsinni isiginnaartitsisartut piukkunaatillit nutaat toqqarneqarput
Varste aamma uaajeertartutut pikkorissutut ilisimaneqarpoq, ilaatigullu Perorsaanermut Ilinniarfimmi, Nuummi Ilinniarfissuarmi, Siorapalummi, Kulusumi Saqqamilu isiginnaartitsinermik ilinniartitsisarsimalluni, ilaatigut Ung i Nordenimut Arctic Winter Gamesimullu atatillugu.
Varste Berndtssonip ilaatigut isiginnaartitsisartunngorniat nutaat aggustimi aallartittussat ilinniartissavai.
Taassumalu tamanna qilanaarutigaa.
- Suliami isiginnaartitsinertut pingaartigisumi misilittakkama atornissaat qilanaareqaara, isiginnaartitsisartoq tusagassiuutinut nalunaarummi oqarpoq.
- Nunatsinni oqalualaarnermik ileqquvut eqqumiitsuliornerup iluani arlalippassuarnit aallaaveqarput. Aammalu Nunatsinni Issittumilu naggueqatitsinni inooriaatsimut immikkuullarissumut attuumassuteqarlutik, isiginnaagassiornermullu paasinninninnut namminerlu pilluta oqaluttuani isumassarsiorfissaapput.
Varste Berndtsson maajip aallaqaataani atorfinissaaq, Makka Kleistilu peqatigalugu piareersaanissamut piffissaqassalluni.
Nunatta Isiginnaartitsisarfiani pisortaq, Susanne Andreassen, suleqatigiinnissamut aamma qilanaarpoq.
- Nunatta Isiginnaartitsisarfiani isiginnaartitsisartoq, uaajeertartoq ilinniartitsisorlu taama piginnaaneqartigisoq tikilluaqqusinnaagatsigu tulluussimaarutigaarput, suleqatiginissaalu qilanaareqalutigu, taanna oqarpoq.
Atuaruk: Elin Nilsson Hans Lyngep legatianik tunineqartoq
Varste Berndtssonip mannakkut pisortaq Makka Kleist ukiuni sisamani atorfimmeereerluni juunip naanerani taamaatittussaq taarsissavaa.
Makka Kleistili soraaruni suliassaaleqissanngilaq.
Ukiormi manna aappaagulu isiginnaagassiassatut pilersaarutaasut saniatigut isiginnaartitsinerup, ilitsersuinerup, dramaturgip coachingillu iluani siunnersortitut namminersortutullu sulissaaq.
Isiginnaartitsisunngorniarfik pillugu uani allaaserisap talerpiata tungaani paasisaqarfigiuk
Isiginnaagassiamit assit: Coster-Waldau angalaalerpoq