Isiginnaartitsisartup tusaamasap Kujataa Google Street Viewimi takutikkaa

Isiginnaartitsisartup tusaamasap Nikolaj Coster-Waldauip - kalaallimik Nukâkamik nuliaqartup - Kujataani sumiiffiit assigiinngitsut Googlep nunap assinganik kiffartuussissutaanik Street Viewimik takutitsisumik Google ullumi saqqummersitsivoq.

Igalikumi angalaarit

Trekkerimik taaneqartartumik immiussat, assinik sfæriskenik taaneqartartunik assiliinermut atorneqartarput, taamaalilluni Google Mapsimi sammivinnut tamanut qiviartoqarsinnaalluni, taakku oktoberip qiteqqunnerani 2016-imi immiussaapput, ilaatigut Igalikumi aamma Uunartumi, kiisalu Sermersuup eqqaani Kiattut Sermiani.

Igalikumi oqaluffik pulaaruk

Suliniummik aqutsisoq Malik Milfeldt taama ilisimatitsivoq.

Coster-Waldau: Tamanna aallaqqaasiutaannaavoq
Nunarsuaq tamakkerlugu nuannaartorinnittut Nikolaj Coster-Waldau isiginnaagassiami nangeqattaartuni ullutsinni nuannarineqarnerpaat ilaannit, Game of Thronesimi, Jamie Lannisteritut inuttaanermini ilisarisimaneqarpoq.

Atuagassiaq Suluk januaarimi/februarimimeersumi isiginnaartitsisartup Googlemik aamma kalaallit ingerlatseqatigiiffiinik assigiinngitsunik trekkerimik assiliiniarluni suleqatteqarnermi tunuliaqutaa oqaluttuaraa:

- Kalaallit Nunaat nunaavoq alutornartorujussuaq periarfissarpassualik (...) Ilimagaara imminut napatissinnaasumik takornariaqarneq Kalaallit Nunaannut inuussutissarsiutaalersinnaasoq nalilerujussuaq. Google Street View aqqutigalugu inuit isersinnaapput Kujataalu qanoq alutornartigineranik qilanaartuutissanik pissarsillutik.

Silap pissusiata allanngoriartornera samminiaraa
Kisianni aamma alla tunuliaqutigineqarpoq. Nikolaj Coster-Waldau septembarimi siorna FN-imut nunarsuarmilu anguniakkanut 17-inut Goodwillimik aallartitatut toqqarneqarpoq, videomilu silap pissusiata allanngoriartornera samminiarlugu aalajangiussimavaa. Nunarsuarmi anguniakkat taakku 17-it atajuartussamik ineriartortitsinissamut 2030-ip tungaanut isumassarsiortitsinissaq siunertaraat.

Nuummi Hans Egedemik inuusaliaq takuuk

Googlep aamma ingerlatseqatigiiffiup Lonely Leapip kiisalu CoCreators Filmip saniatigut sulifeqarfiit uku suliniummik ataqatigiissaarillutik aamma Kujataani filmiliornermut ikiuussimapput: Visit Greenland, Destination South Greenland, immikkullu ittumik Asiaq aamma Air Greenland.

Googlep Kalaallit Nunaannit pingaarnersiugai uani takukkit