pilluaritsi
Isiginnaartitsisartunngortut nutaat neriunaatillit
Isiginnaartitsisartunngorniat naggataarutaasumik takutitassiaat 'Minik' takutinneqarmat isiginnaartunut assigiinngitsunik misigititsivoq
Kalaallit Nunaat nutaanik isiginnaartitsisartortaarpoq. Neriunaatillit Hans-Henrik Poulsen, Klaus Geisler, Mike Fencker Thomsen aamma Majbritt Bech isiginnaartitsisartunngorput, taakkulu Nunatta Isiginnaartitsisarfiata inaani nutaami isiginnaagassiaq 'Minik' takutippaat.
Nunatta Isiginnaartitsisarfiani ukiut marluk atuareerlutik siullersaallutik naammassipput. Isiginnaagassiaq 'Minik, Wanted dead or alive' takutinneqarpoq, tassani inuit sisamat 1897-mi USA-liartinneqartut pineqarluni.
Minik USA-miinnermini kisimiilerpoq, angummillu ataatsimik toqutsilluni. Nunaminut qimaalluni uterpoq, eqqisseqqinngisaannarlunili.
Timi atorlugu
Oqaluttuaq naqqaninngaannit aallartinneqarpoq, Miniup inunngorneranit aallartilluni. Isiginnaartitsisartut assigiinngitsunik isiginnaartitsinermi inuttaapput. Isiginnaartitsisartunngortut suut ilinniarsimanerlugit taamaasilluni takutippaat. Ilaatigut aalariaatsit assigiinngitsinnaat atorlugit allanngortarnerat takuneqarsinnaavoq.
Nipilersuutit
Isiginnaartitsinermi atortunik atugaqarpallaanngillat, assit, guitari tumerparpaallu kisimik atorlugit. Aamma isiginnaartitsinerup iluani nipinik immiussipput, isiginnaartitsinermi tusaaneqarsinnaallutik.
Nutaanik isiginnaartitsisartoqalernera kulturikkut pisuunngujallanneruvoq, tamannami pisariaqartinneqarpoq.
Nunatta Isiginnaartitsisarfiani isiginnaagassiaq tallimanngorpat arfininngorpallu takutinneqassaaq.