aapparinneq
Isertortumik aamma nakuuserfigineqartarpit?
Politiit ilimagaat angerlarsimaffinni persuttaanerit ilaat nalunaarutigineqarneq ajortut
Persuttaanermik politiinut nalunaarutiginninnerit sisamaagaangata ataaseq aappariit akornanni pisimasuusarpoq. Politiilli qularutiginngilaat inuit ilarpassuisa angerlarsimaffinni persuttaanerit nalunaarutigineq ajoraat. Taamaammat innuttaaqataasunit tamatuma eqqumaffiginissaa kaammattuutigaat.
Meeqqioqatigiinneq, najugaqatigiinneq, ataatsimoorussamik aningaasaqarneq ikinngutillu ataatsimoorunnerat nalilersuinermi eqqarsaatigineqartut ilagisinnaalluarpaat angerlarsimaffimmi persuttaaneq nalunaarutigissanerlugu aalajangerniarnermi.
- Pissutsit tamakku pissutaasinnaapput unatarneqartup aallaqqaammut pisumut sakkortugaluartumut iliuuseqannginneranut. Taava ilaquttat, ikinngutit, ilinniartooqatit suleqatilluunniit pisumi taama ittumi sumiippat?, illoqarfiit pingaarnersaanni politiini aqutsisuugallartoq Søren Bendtsen aperivoq.
Taanna isumaqarpoq ingerlaannaq iliuuseqannginneq pisumut akuersaaginnarnertut persuttaasumit paasineqarsinnaasoq
Politiit erseqqissaatigaat persuttaasoqarsimatillugu saaffissat arlaqartut. Napparsimaveqarfimmi ajoqusernerit suliarineqarsinnaapput kommunemilu ilaqutariinnut siunnersortit ikorfartuisinnaapput politiinut taamalu inatsisit tunngavigalugit malersuinissanerluni aalajangiiniarnermi.
- Persuttaaneq persuttaaneruvoq pinerluttaalisitsinermullu inatsimmik unioqqutitsinerulluni apeqqutaanngilarlu aqqusinermi angerlarsimaffimmiluunniit pisimanersoq, Søren Bendtsen erseqqissaavoq.