Isertitsiviit: Ikiaroornartunik eqqussisoqartarnera pinngitsoorneqarsinnaanngilaq

- Taamaasiussaagut, sapinngilarput.

Isertitsivimmiittut ikiaroortarnerat ajornartorsiutaasoq anigorneqartussaq pillugu,
Nuummi pineqaatissinneqarsimasut isertitsivianni pisortap Peter Petersenip 2008-mi KNR-imi oqaatigaa.

Ikiaroornartoq isertitsivinni atorunnaarsinneqarnissaa anguniaannarnagu aamma isertitsivimmiittut ikiaroortarunnaarnissaat anguniarneqartoq Peter Petersenip oqaatigaa.

Naak iliuuseqartoqartaraluartoq ajornartorsiut suli ajornartorsiutaavoq.

Qaqortumi eqqartuussivimmi pineqaatissiinerup tamanna takutippaa. Tassani ikiaroornartulerisoq isertitsivimmiittussanngorlugu pillarneqarpoq. Isertitsivimmi 0,6 grammimik paarisaqarsimanera pissutigalugu ilaatigut ukiup aappaa avillugu isertitsivimmiittussatut eqqartuunneqarpoq.

Ikiaroornartulerisup parnaarussivimmiinnermi nalaani ikiaroornartumik paarisaqarsimanerata takutippaa isertitsivimmi misissuisarnerit sakkukippallaartut.

Isumaginnittoqarfik: Ajornartorsiutaajuassaaq
Kalaallit Nunaanni Pinerluttunik isumaginnittoqarfiup pisortaata Hans Jørgen Engbop oqaatigaa, pisut tupaallannanngitsuusut.

- Nunatsinni isertitsiviit ammasuupput. Nunani allani parnaarussiviit matoqqasuugaluartut assingusumik ajornartorsiuteqarput. Danmarkimi aamma Kalaallit Nunaanni sulisimaninni misilittakkakka aallaavigalugit oqarsinnaavunga isertitsivinni ikiaroornartoqartarnera oqarasuaatinillu angallattakkanik nassaassaqartarnera pillugu suliat imaaliallaannaq iluarsineqarsinnaanngillat.

Isertitsivinni ikiaroornartoqartarnera Hans Jørgen Engbop Sermitsiaq.AG-mut oqaatigaa misissorneqartartut aamma.

- Ikiaroornartumik paarisaqarneq inerteqqusaavoq sumiikkaluaraanniluunniit. Isertitsivinni sulisut misissuisuaannarput, aamma qimmit misissuinerni atorneqartarput. Ikiaroornartunilli eqqussisoqartarnera ajornartorsiutaavoq qaangeruminaatsoq. Maani ajornartorsiuterput aamma timmisartoqarfinni atuuppoq.