Ironman Copenhagen 2014
Ironmaneqataasoq: Peqataalluni pikkunarpoq
Ironman Københavnimi sapaatiummat ingerlanneqarpoq - kalaallit arnat marluk peqataapput
Nivi Geisler aamma Pitsi Ottosen tamarmik Nuummeersut Ironman Copenhagenimi sapaammi ingerlanneqartumi peqataapput. 3,8 kilometerini nalupput, 180 kilometerini sikkilinik kiisalu marathonerlutik. Nivi Geislerip 14 tiimit, 9 minutsit sekundillu 45-t atorpai, Pitso Ottosenip akunnerit aqqanillit, 53 minutsit 49 sekundillu atorlugit.
Nivi Geislerip Sermitsiaq.AG-imut oqaluttuaraa aallartinnera sakkortunaarlugu.
- Nalunnissarput annilaangaginerpaavara aallartinnginnitsinni, Kalaallit Nunaannimi immami sungiusartoqarsinnaanngilaq imaq nilleqimmat. Peqataasorpassuaqarpoq, nalunnermilu sungiussiniaqqaarpunga. Aamma peqataasut ilaat qarsutsittarput, tamannalu tupannaqqaarpoq. Nalunnertaani sukataarnersaavunga, nalunnitsinni aamma aatsaat nalunnissara sungiukkiartulerpara, Nivi Geisler oqaluttuarpoq.
Aqqusaagassat
Naloreernermi kingorna sikkilerpoq. Tassani Nivi Geisler ajunnginnerusumik ingerlavoq.
- Sikkilernitsinni siallileriasaarpoq anorlilerlunilu. Sikkilerninni sikkilimma assakaasui aamma qaariasaarput. Siullermik nammineerlunga iluarsiniarsarigaluarpara, qujanartumilli biilinik aggertoqarpoq ikiuisartunik. Iluatitsisutut misigaanga ikiorneqarama, tassami nammineq suliarisimasuugukku eqqarsaraluarama akunnerpassuarni suliarissallugu, Nivi Geisler oqarpoq.
180 kilometerini sikkilereerluni marathonerluni arpappoq.
- Sikkilereernerma kingorna kilometerini tallimani siullerni arriitsumik arpappunga niukka sungiussitinniarlugit. Kilometerini tallimani siullerni arriitsumik arpareerlunga ingerlallualerpunga. Isiginnaartut tapersersuinerat nukittorsaaqataaqaaq, aamma arlaleriarlunga tusaavara atera taaneqartoq. Kilometerimi kingullermi arpanninni nuannersumik misigisaqarpunga, qungujulavunga naak sukataaraluarlunga. Apuuffissara tikillugu tamaviaarlunga arpappunga, Nivi Geisler oqarpoq.
Siunissami misileqqikkusuppaa.
- Unammeqataanerma ingerlanerani qujanartumik qasorujussualinngilanga, timikkut eqqarsartaatsikkullu ukiumi ataatsimi sungiusarnikuuneri pissutaallutik. Misileeqqissagumali nalunnertaanut pitsaanerulersimasariaqarpunga, tassami aallaqqaataani tupannaqqaarami. Maannakkulli nalunngilara qanoq piareersassanerlunga, ilaqutannit ikinngutinniillu tapersersorluarneqarnera nuannaarutigeqaara, Nivi Geisler oqarpoq.