Ironbark piiaanissamut akuersissummik pissarsivoq

Ironbark A/S piiaanissamut akuersissummik tunineqarnissaa Naalakkersuisut ullumi akuersissutigaat.

Tunup Avannaani zinkimi aqerlumillu Citronen Fjordimi piiaanissamut akuersissut atuuppoq.

Akuersissutip atsiorneqarnera aqagu nalunaaqutaq 14:00 pissaaq, tassani aatsitassanut naalakkersuisup, Múte Bourup Egedep (IA) aamma suliffeqarfimmit aallartitap akuersissut atsiussavaat.

Suliniut annertooq
Citronen Fjordimi suliniut nunarsuarmi zinkinik aqerlunik peqarnersaasut ilaanniippoq. Suliffissaasinnaasullu uuttoraanni Citronen Fjordimi piiaaffiit ingerlanneqalersut annersaasa ilagaat.

Sulisut nunaqavissut
Suliniummi ingerlatsinerup nalaani inuit 470-it sulisussanit, inuit 290-it piiaaffimmiiginnavittassapput.

Nunaqavissut sulisut amerlanerpaatinniarneqarnissaat anguniagaavoq - aallaqqaammut sanaartornerup nalaani nunaqavissut 63-it, piffissap ingerlanerani amerliartortut - ilaatigullu piukkunnarsaanernut assigiinngitsunik nukittorsarneqassalluni.

Atuaruk: Ironbark sakkortuumik isornartorsiorneqartoq

Aappaagu immaqa aallartissasoq
Ironbarkip qinnuteqaatini siorna septembarimi tunniuppaa. Tamatuma kingorna avatangiisinut misissuineq (VVM) aamma (VSB) tusarniaassutigineqarput.

Ukiormanna septembarimi IBA-mik isumaqatigiissut inissinneqarpoq. Tamatuma ilaatigut nunaqavissut amerlassusaat ilinniarnissamullu inissat aalajangersartarpai, taamatullu piiaffimmik ingerlatsinermi ilinniarnermut aningaasaateqarfik ilaatigut aalajangiiffigiusarpoq.

Ironbark taamaalilluni aappaagu piiaaffiup sanaartornissaata aallartinnissaanut periarfissaqalerpoq.