Iran Nunatsinnik qaninnerusumik suleqateqarniarpoq

Siumut tunuliaqutaralugu folketingimut ilaasortaq Doris Jakobsen pingasunngormat Iranip Danmarkimi ambassadørianit Hamid Bayat-imit pulaarneqarpoq.
Doris Jakobsenip oqaatigaa Iranip kissaatigigaa aalisarnerup iluani qaninnerusumik suleqatigiinnissaq - niuernikkut, teknikkikkut ineriartortitsinermi ilisimatuussutsikkullu misissuinermi, taakkulu saaffiginnissuteqarneranut tunngaviupput.
– Iranip naatsorsuutigaa, Iran-imut kinguneqartitsisimanerit sakkukillineqassasut. Tamannalu naatsorsuutigineqarpoq sapaatit akunnerini makkunani USA-mut isumaqatigiinniarnerit ingerlanneqarnerini, tassalu Iran-ip atormip nukiganik programmiata nakkutigineqarnera pillugu. Kinguneqartitsitsisimanerit sakkukillineqarnerisa kingunerissavaa, Iran-ip annertunerungaartumik aningaasanik annissuisinnaanera aammalu nunamut aningaasanik eqqussuisinnaanera, aammattaaq nunat tamalaat akornanni aalisarnikkut aningaasaliisinnaanera periarfissaqalissalluni, Doris Jakobsen nalunaarummi allappoq.
Uranimik? Naagga qujaannarpugut
Uranimik piiaaqqusinngilluinnarnerup atorunnaarsinneqarneranut pulaarnermut tunngaviunersoq Dorisip apeqqutaanut, ambassadøri qungujulluni ilisimatitsissutigivaa, Iran nammineq uranimik pilersortuusoq – tassuunalu Kalaallit Nunaat atorfissaqartinnagu.