Kommunikation
iPads-it juullertinnagu attavinissapput
Namminersortut suliffeqarfiutaat Inu:it A/S qulakkeerinnittussatut iminneqarpoq atuartut ilinniartitsisullu 3.000-ut Qeqqata Kommuniani Kommune Kujallermilu iPads-itaarnissaannut
iPads-inik 3.000-nik Qeqqata Kommuniani Kommune Kujallermilu atugassanik pisiniarnissaq maanna suliarinnittussarsiuunneqalerpoq. Aamma isumaqatigiissutigineqarpoq iPads-it WiFi-mi attavissaat suliffeqarfiup Nuummeersup Inu:it A/S-ip isumagissagai iPadit juullertinnagu Qeqqata Kommuniani Kommune Kujallermilu atuartunut ilinniartitsisunullu agguaanneqarpata.
Villum Fondenip aamma kommunet pineqartut marluk suleqatigiinnerisigut meeqqat atuartut ilinniartitsisullu akeqanngitsumik iPaditaartussanngorput.
Suliniummut namminersorlutik oqartussat taperseeqataapput atuarfeqarfiit it-mut aqqutaata attatip annertusaaviginissaa aningaasaliiffigigamikku.
- Atuarfimmi atuarfiullu avataani internetsimut attaveqarsinnaaneq pillugu teknikkikkut aaqqiissussat arlaliusimapput. Illoqarfiit nunaqarfiillu ataasiakkaat iluini killeqanngitsumik attaveqarsinnaanermut Inu:it-ip aaqqiissutaa pitsaanerpaasutut iluaqutissaqarnerusutullu, borgmesterinit marluusunit Hermann Berthelsenimit Jørgen Wæver Johansenimillu isumaqataaffigineqarpoq. Taamaalilluni atuartut akunnerminni attaveqaqatigiissinnaanissaat kiisalu atuarfiup angerlarsimaffiullu akunnerminni atuartitsinissamut pilersaarutinik ilinniagassanillu il.il. attaveqaqatigiissinnaanissaat periarfissanngussalluni, Qeqqata Kommunia nalunaarpoq.
WiFi-kkut atuarfimmi attavik flatratemut attaveqarnermut assersuunneqarsinnaassaaq.