Ukiuunerani OL

IOC: Ukiuunerani OL-ertitsillusi 5,6 milliardit koruuninnagitsi

OL-ertitsinissamut illoqarfiit aaqqissuusserusuttut pilerngussinngillat, maanna nunat tamalaat OL-imut ataatsimiititaliaa IOC, 2026-imi ukiuunerani OL-imut aaqqissuisuuniartumut milliardinik aningaasaliinialerpoq.

Kinami Beijing aamma Kassakhstanimi Almaty taamaallaat 2022-mi ukiuunerani OL-imut aaqqissuisuunissamut piumasimapput, taakkulu ikippallaartut IOC isumaqarpoq, maannalu aningaasanik atuinialerput.

- OL-ip aaqqissuunneqarneranut IOC tapiiniarpoq, taakkulu 925 millionit dollariussapput (5,6 milliardit koruunit missaat, aaqq.), tamannalu 2026-imi aaqqissuisussanut oqaatiginikuuarput, IOC-imi pisortaq Christophe Dubi oqarpoq.

Schweizimi Sion, Sverigemi Stockholm, Canadami Calgary aamma Japanimi Sapporo 2026-imi aaqqissuussisuunissamut qinnuteqarnissaq misissuiffiginiarpaat.

USA-mit Salt Lake City, Denver aamma Reno-Tahoe aaqqissuisuusinnaapput, kisianni taakku soqutiginninnerat 2030-miusinnaavoq.

Ukiuunerani OL-erneq ukiormanna Korea Kujallermi Pyeongchangimi pissaaq, 2022-mi Kinami Beijingimi pissalluni.

Powered by Labrador CMS