katerisimaarnermut kulturi
Inuusuttut tiinganiaqqaalernermut pikkorissartariaqarput
Uanga aamma inuusuttuullunga puullaaqisuuvunga, Malene Lynge oqaluttuarpoq, taassuma inuiaqatigiinni maligassiuisut ersarinnerunissaannut kajumissaarivoq
Inuusuttut ataqqeqatigiillutik pitsaasumillu tiinganermut kultureqarlutik peqateqarsinnaanertik ilinniassavaat.
IA-meersoq Malene Lynge taama isumaqarpoq, taamaammallu sunngiffimmi neqeroorummik siunnersuuteqarpoq; inuusuttut tiinganiaqqaalernermut pikkorissarfiat.
- Kulturikkut, inuttut aamma inuiaqatigiittut naleqartitat pillugit oqallittariaqartugut isumaqarpunga. Taamaammat sunngiffimmi neqeroorummik eqqarsaateqarpunga, mamartunik iganermik viinnimillu ussiinertalimmik (18-ileersunut) aamma ''ileqqorissaarnermi'' imaluunniit tiinganiarnermut ilinniartoqartassalluni, Malene Lynge oqarpoq.
Naak aliikkutassiaannartut nipeqarsinnaagaluartoq, tiinganiarnermut pikkorissarneq inuunermi unammilligassanut arlalinnut iluaqutaasinnaavoq, politikeri isumaqarpoq.
- Kingorna assigiinngitsorpassuartigut atorneqarsinnaasumik sakkussaqalersitsisinnaavoq, assersuutigalugu suliffeqarnermi, Kommuneqarfik Sermersuumi politikeri oqarpoq.
Malene Lyngep inuusuttuunermini inersimasut ikiuisimasut misilittagaqarfigisani aallaavigai.
- Inuusuttut tamarmik inuunermi pitsaasumik nassuiaassiffigineqarnissamut periarfissaqarneq ajorput. Inuusuttuunera puullaaqqinartoq kinaassutsimik nassaarneq assigisaanillu ajulerneq eqqaamavara. Tamanna ajornaatsuinnaanngilaq, kisianni siunnersorneqarlungalu ilitsersuunneqarpunga, tapersersorneqarlungalu, siunnersuutinnilu tamanna pingaarnersaavoq, taanna oqarpoq.
Maligassiuisut atorneqarnerunissaat saqquminerunissaallu Malene Lynge isumaqarfigaa, inuusuttut pitsaasumik qanoq takorliuttarnissartik takuniassammassuk.
Pikkorissunik nipilersortartunik, isiginnaartitsisartunik, alkologinik, sexologinik, psykoterapeutinik, ilinniartitsisunik, perorsaasunik allarpassuarnillu inuusuttortatsinnut oqaluttuassalinnik peqarpugut. Taakku atussavagut, Malene Lynge naqissusiivoq.