kampagne

Inuusuttut suliffissaaleqisut nutaamik suliniuteqarfigalugit

Inuusuttut amerlanerusut sulilissapput. Kommuneqarfik Sermersooq sulinermik sungiusartitsinermut aningaasanik nassaarpoq

Kommuneqarfik Sermersuup inuusuttut amerlanerusut sulisilerniarpai.

Kommuneqarfik Sermersooq Nuummi ingerlatsivinni inuusuttut sulinermik sungiusartinnissaannut aningaasanik immikkut ittumik pissarsisimavoq. Inuusuttut piffissami sulinermik sungiusarnerminni ilinniagaqarnersiuteqassapput. Kommunip neriuutigaa sulinermik sungiusartitsinermik neqeroorummut tassunga ingerlatsiviit pitsaasumik suleqatigineqalissasut.
Piareersarfik Nuuk ilitsersuinermut allaffimmik pilersitsivoq, taassumalu sulissutigissavaa inuusuttut 15 aamma 29 akornanni ukiullit suliffissaaleqisut ikilisartinnissaat. Suliniummut atatillugu kommunip inuusuttut sulinermik sungiusartissavai, taamatullu sulinerminni ilinniagaqarnersiuteqassapput.
Siunertaavoq inuusuttut sammisamik soqutigisaminnik sulinermik sungiusartinneqassasut. Taamaasilluni kommunip neriuutigaa amerlanerusut ataavartumik suliffeqalerumaartut.
Taamatut Kommuneqarfik Sermersooq tusatassiorfinnut nalunaarutikkut paasissutissiivoq.
Sulisitsisut inuusuttunik sulinermik sungiusartitsinissamik soqutiginnittut ukununnga saaffiginnissinnaapput inuusuttunik ilitsersuinermut allaffimmut Karen Olsenimut, Hansenkaoh@sermersooq.gl imaluunniit Hans Jakob Davidsen haja@sermersooq.gl, aamma Piareersarfimmut 36 63 60-imut sianertoqarsinnaavoq

Powered by Labrador CMS