Demokraatit inuusuttaat

Inuusuttut partiiannit: Kisermaassineq unitsinneqarli

Timmisartuutileqatigiiffik Greenland Express Gert Brask-imit aallartisarneqatup aallartinnissaa Demokraatit inuusuttaannit qisuariarfigineqarpoq

- Nunanit allanit nunatsinnut aningaasaliisoqartalissappat akit tungaatigut iluarsiisoqartariaqarpoq, nunarsuarmioqatitta akigititaanimmi assingusunik akeqartitsisariaqarpoq, Demokraatit inuusuttaasa siulittaasuat Randi Vestergaard Evaldsen oqarpoq

- Air Greenlandimut ilaalluni akisuvoq, Royal Arctic Line-kkut nassiussilluni aamma akisuvoq. Kiffartuussinerni unammilleqatigiittoqarnissaa piffissanngorpoq. Kisermaassineq unitsinneqartariaqarpoq, suliffeqarfiillu assigiinngitsut unammillilersinnaasariaqarput.

Demokraatit inuusuttaasa siulittaasuat Randi Vestergaard Evaldsen oqarpoq.

Greenland Express-ip aallarnisaasuata Gert Brask-ip DR Nordjyllandimut oqaatigaa timmisartuutileqatigiiffik juunimit ilaasunut kiffartuussisinnaalissasoq, oqaatigalugulu Aalborgimit nunatsinnut sapaatip akunneranut arfinileriarluni timmisartuussisoqartalissasoq oqaatigalugu.

Taama oqartoqarnera Demokraatit inuusuttaannit nuannaarutigineqarpoq, timmisartukkummi angallassinermi kisermaassineq taamaasilluni atorunnaassammat.

Akit unammilleqatigiinnermut tulluartut
- Takornarialerinermut aatsitassarsiornermullu inerisaasoqalernissaa piukkunnarpoq. Maannamulli Air Greenlandimut pinngitsaalisamik ilaanissarpugut. Nunanut allanut nassiussissagutta nassiussanilluunniit nunanit allaneersunit tigusissagutta pinngitsaalisamik Royal Arctic Line atorneqartarpoq. Suliffeqarfiiit akigititaat annertuallaarput, tamanna atuisunit malugineqartarpoq, Randi Vestergaard Evaldsen oqarpoq.

- Nunanit allanit nunatsinnut aningaasaliisoqartalissappat akit tungaatigut iluarsiisoqartariaqarpoq, nunarsuarmioqatitta akigititaanimmi assingusunik akeqartitsisariaqarpoq. Kisermaassilluni aqutsineq siunissami isumalluutigiinnarneqarsinnaanngilaq. Aningaasaqarnikkummi siuariartorfiusinnaanngilaq, takornarissat akit orniginavianngilaat nunatsinnilu aningaasaliiniartut aamma aningaasaleerusunnaviarnatik, Demokraatit inuusuttaanni siulittaasoq oqarpoq.

- Kalaallit Nunaanni akit qaffasippallaarnerat pissutaalluni takornarissat amerlatsikkiartunngillat, Randi Vestergaard Evaldsen oqarpoq.

Powered by Labrador CMS