Tryk på

Inuusuttut oqaluttualiaat atuakkiarineqarput

´Nunatsinni inuusuttuuneq, Nunarsuarmi inuusuttuuneq´ tallimanngorpat saqqummersinneqassaaq. Nuummi meeqqanut atuakkanik atorniartarfimmi oqaluttuarliortut ilaasa oqaluttualiatik atuaraat tusarneqarsinnaavoq

Allatta- Nunatsinni inuusuttuuneq, Nunarsuarmi inuusuttuuneq

Allatta - Nunatsinni inuusuttuuneq, Nunarsuarmi inuusuttuuneq, tassa inuusuttunut inuusuttunillu oqaluttuaaraliat. Atuakkiortussamaatit kalaallit qulit oqaluttuaaraliorsimapput, tiguartinnartumik oqaluttuaralugu inuunerminni aallaavissaminnik sorsuutiginninnertik, sumiginnagaasutut meeraasimagaluarlutik nammineq naleqassutsiminnik upperinninnertik, asanninneq siulleq, arnaqammut/anguteqammut asanninneq, nunarsuarmut paasisassarsiorluni angalaneq allarpassuillu.
Oqaluttualiortut qulit Allatta-mik unammisitsinermi ajugaasuupput, taannalu NAPA-p, Nunatta Atuagaateqarfiata, NUIF-ip aamma milik publishing-ip 2012-imi unammisitsissutigaat. Inuusuttut 15 aamma 25-t akornanni ukiullit katillugit 36-it oqaluttuaaraliaminnik nassiussaqarsimapput, naliliisullu, tassaasut Kalaallit Atuakkiortut siulittaasuat Hans Anthon Lyngep, lektor Birgit Kleist Petersenip, taalliortup Katti Frederiksenip eqqumiitsuliortullu Jessie Kleemannip pitsaanerpaat qulit toqqarsimavaat. Ajornakusoortumik nalilersuereerlutik oqarput:
– Oqaluttuaaraliatigut nalerput ajunngitsutigut ajortutigullu oqaluttuarineqarpoq. Amerlasuut paquminartinneqartartut qaqissimavaat, oqaluttuaaraliallu arlallit nammineq atukkanik qaangiiniarpasinnerupput pissanganartorujussuarmik. Tamanna kalaallit atuakkiortarnerisa nutaamik ineriartorneranut takussutissaavoq. Siunissami kalaallinut atuakkiortunut neriunartoqarluarput.
Nunatsinni inuusuttuuneq, Nunarsuarmi inuusuttuuneq 199,- koruuninik akeqarpoq pisiarineqarsinnaallunilu atuagaarniarfinni, Brugsenimi, Pisattani Pilersuisullu pisiniarfiisa ilaanni. Atuakkap saqqummersinneqarnera tapiiffigineqarsimavoq Kommuneqarfik Sermersuumit, Tips- og Lottomi aningaasanit aamma Nordisk Kulturfondimit.

Powered by Labrador CMS