Inuusuttut OL-erneranni kalaallimik peqataasoqassaaq

Ujakkaartartoq 16-inik ukiulik, Bjarne Hansen, European Youth Olympic Festivalimut, inuusuttut OL-ernerannik aamma taaneqartartumut peqataasussanngorpoq.

Inuusuttut OL-ernerat februaarip 11-annit 18-iat ilanngullugu Tyrkiami pissaaq.

Atuaruk: Sisoraatinik oqilaniunnermi kalaaleq kuultinnappoq

Nunanut allanut sungiusaasoq tulluusimaartoq
Bjarne Hansen ulluinnarni timersorneq sammisaralugu Nuummi GUX-imi ilinniartuuvoq, 2016-imi Arctic Winter Gamesimilu angusani pillugit peqataasussanngortinneqarpoq. Taassuma ujakkaarnermi Nunatta ujaminnattatuaa kuulteq pissarsiaraa.

- European Youth Olympic Festivalimut Bjarneq Hansenip anngunnera tulluusimaarutigaarput. Arpattartoq akunnerpassuit atorlugit sungiusartartoq aamma pimoorussilluni sungiusartartoq peqataatinneqalermat nuannaarutigaarput, ujakkaartartut nunanut allanut unammisartut sungiusaasuat, Øystein Slettemark, oqarpoq.

Unammiuaartunukassasoq
Bjarne Hansen unammiuaarnissanut piareersarniarluni Martin Møller, Frederik Petersen aamma Erik Amondsen uani qaammammi Sverigimut unammiuaarnernut malinnaaffigiartussavai. Tassani Sverigimi juniorit unammisartut pitsaanerpaat unammissavai.

European Youth Olympic Festivalimut peqataasuni Bjarne Hansen kalaalertatuaassaaq, ujakkaartartumilli aamma Danmarkimeersunit sangusaartartunik arfineq-marlunnik ilaqassaaq.