Inuusuttut marluk sapiitsuliornerminnut akissarsitinneqartut

Nanortalimmi politiit marsip aallaqqaataani angutinut inuusuttunut marlunnut akissarsititsipput, taakku 2015-ip naalernerani pisuni assigiinngitsuni marlunni qanoq iliornissamut nukissaqarnermik takutitsipput, taamaalillutillu inuit marluk allat inuunerannik annaassillutik.

Akissarsiap aappaa 16-iinnarnik ukiulimmut Ulloriaq Petrussenimut tunniunneqarpoq, taassuma oktobarip 31-ani angut inuusuttoq Nanortalimmi ipigaluartoq annaappaa.

Angut toqungasoq
Ulloriaq Petrussen immami angummik toqungasumik nassaarpoq. Taannalu qaqippaa, anersaartunngimmallu 16-inik ukiullip ikiueqqaarnermigut uummartippaa.

Ulloriaq Petrussenip angutip anersaartornera aallarteqqippaa, taamaalillunilu iliuuseqapallannermigut inuup inuunera annaappaa.

Taamatut iliuuseqarneranut Ulloriaq Petrussen checkimik 1.000 koruunimik nalilimmik akissarsitinneqarpoq.

Imaq nillertoq
Akissarsiap aappaa 30-nik ukiulimmut Henrik Emanuelsenimut tunniunneqarpoq.

Decemarip pingajuanni illoqarfimmit angerlarluni, arnaq immamut nillertumut pisimasoq nassaaraa.

Nillertissimasoq
Henrik Emanuelsen nakimaatsumik qisuariarpoq, immamullu arnaq ornillugu aqqariarluni qaqippaa. Taanna nillertingaatsiarsimavoq, inuillu allat ikiuupput atisanik allanillu kissassimaartitsiniarsaralutik.

Arnaq taanna nillertissimaqisoq napparsimmaviliaanneqarpoq, minnerunngitsumik Henrik Emanuelsenip iliuuseqarneratigut inuunera annaanneqarluni.

Qujassutitut checkimi 1.000 koruunimik nalilimmik aamma Tele Greenlandimit mobilimik tunineqarpoq, immami nillertumi annaassiniarnermini mobilia ajortissimammat.

Nersorneqarneq
Akissarsitinneqartut marluullutik taamaalillutik sapiitsuliornerminnut annertuumik nersorneqarput, taakku iliuuseqarnermikkut inuup inuuneranik annaassigamik, Nanortalimmi politiit erseqqissaapput.

Ulloriaq Petrussenip aamma Henrik Emanuelsenip assingi uani ataani takukkit