pilluaritsi

Inuusuttut Koda-mit ajugaasuupput

Erinniortunut taalliortunullu Kodap nersornaatai ukiormanna inuusuttunut agguaanneqarput agguaassineq sapaammi pimmat

Jenseeraq Olsen Sisimiuneersoq Kodap nersornaataanik tuneqarpoq.

Erinnat tusaqqooruminartut soorlu ’Arraannguaq’ aamma ’Lallalaa’ Kodap nersornaasiinermut ataatsimiititaliaani aamma maluginiarneqarsimapput. Erinnanik taakkuninnga sanasoq Jenseeraq Olsen Sisimiuneersoq 2012-mi saqqummersitanik torrallaanerpaatut Koda-mit nersornaaserneqarpoq.

Jenseeqqap erinnanik tusaqqooruminartunik nipilersuutilalersuillaqqissutsini nersornaaserneqaatigaa.

Assorsuaq aamma nuannarineqarpoq Small Time Giants neriunaatilittut nersornaaserneqarmata. Nipilersoqatigiit taakku nunani arlalinni appisimaartareersut arfininngornermi unnukkut Akisuanerit Festivalimi tusarnaartitsilualaavipput nipilersullaqqissusertik nittarsaalluaramikku.

Nipilersoqatigiit nutaalerioriarsinnaassuseqarlutik isumalluarnartuupput nipilersukkaminni taalliaminnilu, erinnioriaatsiminni erinarsugassioriaatsiminnilu aamma avammut saqqumiussisarnermi. Aqqutissanik periarfissanillu nutaanik aamma nassaarsiortuupput, Kodap nersornaasiinerani naliliisut allapput.

Kodami ataqqinaammik nersornaat ukiorpaalunni nipilersortartunut misilittagartuunut tunniunneqartartoq ukiormanna 27-nik ukiulimmut Inunnguaq Petrussenimut tunniunneqarpoq.

- Inunnguaq Petrussen maligassiuisuuvoq, erinniornerup taalliornerup nunatsinnilu nipilersornerup silarsuaani ataqqisarialimmik maligassiuisutut nersornaaserneqarluni, Kodap nersornaasiinermut ataatsimiititaliaa tunngavilersuivoq.

Nersornaatisisut tamarmik checkimik 25.000 koruuninik aningaasartalimmik tunineqarput

Ataasinngornermi ullaap tungaa Sermitsiaq.AG-mi saqqummiunneqassapput Koda Awards 2013-mit assilisat.

Powered by Labrador CMS