oqallinneq

Inuusuttut kalaallisut atuartinneqarusupput

Naalakkersuisoq Suka K. Frederiksen meeqqat atuarfianni atuartunut kalaallisut atuartitsisoqarnissaanik ukkataqarnissamut kissaateqartunut tusarnaarpoq

Nuummi meeqqat atuarfiini atuartut angajulliit 30-t naalakkersuisup Suka K. Frederiksenip namminiilivinnissaq pillugu oqaloqatigalugu ataatsimeeqatiginissaanut qaaqquneqarsimapput.

Ataatsimiinnermi inuusuttut qallunaat oqaasiinik atuartitsisarneq, inuusuttut atuarfiini unitsitsiinnartartut amerlanerinut pissutaaqataasoq nassuiarlugu nalilerpaat.

Atuaruk: Kalaallisut ilinniartitaanissamut aqqut takisoq

- Kalaallit oqaasiisa meeqqat atuarfiini pingaartinneqarnerisulli GU-mi ilinniarfeqarfinnilu allani pingaartitsisoqartariaqartoq aamma oqaatigineqarpoq. GU-mi atuarfinnilu allani ilinniartitsinermi qallunaat oqaasii pingaarnerpaasarput. Atuartut isumaqarput ilinniarnerminnik unitsitsiinnartartorpassuit tamanna peqqutigisaraat, Naalakkersuisut ataatsimiinnilersaarutaanni tamanna atuarneqarsinnaavoq.

Paasissutissanik pisariaqartitsineq
Namminiilivinnissap anguniarneqarnerani atuartitaanerup pitsaassusaata appasinnerulersinneqannginnissaa atuartuniit eqqumaffigineqartariaqarsorineqarpoq.

Atuaruk: Inuusuttut amerlanerusut ilinniarsimanatillu suliffeqanngillat

- Namminiilivinnermut tunngatillugu innuttaasunik ataatsimiititsigaangatta ilinniartitaaneq inuusuttullu oqallisaanerpaajusarput. Taamaattumik pingaartippara inuusuttut eqqarsaataat, erngumassutaat, qilanaarutaat qularnartoqartitaat uummammiuilu tusassallugit. Namminiilivinnermut, Pinngortitamut, Avatangiisinut Nunalerinermullu Naalakkersuisoq, Suka K. Frederiksen inuusuttunut taama oqarpoq, tamatuma saniatigut namminiilivinnissaq pillugu paasissutissanik pissarsinerusalernissaat neriorsuutigaa.

Powered by Labrador CMS