Kalaallit Røde Korsiat
Inuusuttut inuusuttoqatitik ikiorpaat
Uiloq Leonhardtip inuusuttut allat ikiorsinnagamigit nuannaarutigaa
Kalaallit Røde Korsiata inuusuttunut suliniutaa Inuusuttut Nukittoqatigiit (Inua) ataasinngornermi septembarip 15-ianni Nuummi Oles Varehusimi tamanut ammassaaq. Tassani inuusuttut 35-it angullugit ukiullit GU-milu ilinniartut Inua-mi piumassutsiminnik ikiuuttalernissartik isumaliutigisinnaavaat, ornigullutik kaffisorlutik kaagitorlutillu, Inua-lu sulerinersoq tusarlugu.
Uiloq Leonhardt, 19-inik ukiulik, GU-mi ilinniartuuvoq Inua-milu piumassutsimik ikiuuttarluni. Isumaqarpoq tamanna pissanganartuusoq, pissutigalugu imminut ilinniartorujussuugami, ilumigullu pitsaasumik misigisimasarpoq malugigaangamiuk inuusuttut allat ikiorlugit.
– Ilaannikkut inuusuttut sammisaqartittakkavut Nuummi aqqusinermi naapittarpakka, ornikkaanganngalu oqaloqatigalungalu nuannaartorujussuanngortarpunga. Taava misigisarpara iliuutsitsigut inuusuttut ikiorivut. Aamma piumassutsimik ikiuuttut akornanni ataqatigiilluartorujussuuvugut, pitsaasumillu suliaqaqatigiinneq nuanneqaaq, Uiloq Leonhardt oqarpoq.
– Inua-mi piumassutsimik ikiuuttuunerit nammineq sumik pissarsiffigaajuk?
– Suliniummik piginneqataasutut misigisimavunga, misigisimavungalu pitsaanerusumut allanngortitseqataallunga. Inua suliniutaavoq, sunik, Kalaallit Nunaanni inuusuttunut ajornakusoorsinnaasunik suliniutilik. Suliniummut inuusuttut ajornartorsiornerannik aammalu uagut inuusuttut nukittuujunitsinnik immitsinnullu ikiorsinnaanitsinnik samminnittumut peqataalluni nuanneqaaq.
– Sooq inuusuttut inuusuttunik allanik sammisaqartitsinerat pitsaasuuva?
– Isumaqarpunga inuusuttut, sammisaqartitsinitsinni peqataasartut, sukkasuumik misigisaraat uagut piumassutsimik ikiuuttut qanillilluta, pissutigalugu uagut nammineq inuusuttuugatta. Inuusuttutut inuunivut assigiissorujussuupput, inuusuttullu sammisaqartitsinitsinnut takkuttartut ulluinnarni ajornartorsiutaat ilisimavagut. Taamaattumik inuusuttut piumassutsimik ikiuuttugut nalunngilarput Kalaallit Nunaanni inuusuttuuneq qanoq innersoq, Uiloq Leonhardt oqarpoq.