inuunerinnerulernissaq
Inuusuttut inuusuttoqatiminnik ikiuisut: Siuariartorput ammanerulerlutillu
Nuummi atuartut najugaqarfianni Kalaallit Røde Korsiat-Inua sammisaqartitsivoq. Nammineq kajumissusertik aallaavigalugu suliaqartut inuusuttuaraanerminni aamma ajornartorsiuteqarsimapput
23-nik ukioqartoq Henrik Petersen peroriartorluni ajornartorsiuteqarpoq. Maannakkullu nammineq kajumissutsini atorlugu suliaqarpoq. Misilittagarisani atuartut angerlasimaffianni najugaqartunut oqaluttuarisarpai.
- KRK-Inuami nammineq kajumissutsit atorlugu suliaqarninni suut iluaqutaappa?
- Nalinginnaasuunngitsunik sammisaqartarpugut, immitsinnut oqaloqatigiittarpugut arlaannik ajornartitaqaraanngatta. Atuartut angerlarsimaffianni najugaqartut tunuarsimaakujuttuupput, peqatigigaangatsigit sammisaqarnerusarlutik. Inuttut ammanerujuartuinnarput, tamanna isigalugu nuannerpoq. Inuusuttummi ataqatigiillaqqissuusarput, naak nammineq kajumissutitsinnik suliaqaraluartugut maligassiuisuuvugut. Inuusuttuuvugummi inuusuttoqatitsinnik sammisaqaqateqarnermik nuannarisallit.
- Nammineq kajumissusernik sulinerit pikkoriffigaajuk?
- Qiimmatitsisinnaasarpunga, inummi nuannaartuuvunga. Meeraallunga qinngasaartittarnikuuvunga, taamaattumik qinngasaarisarnerup iliuuseqarfigineqarnissaanut suleqataasarpunga. Qinngasaartinnermi qanoq misiginarnersoq nalunngilara. Pissutsit assigiinngitsut pissutaallutik qinngasaarisoqartarpoq. Qinngasaartittut aliasuttarput. Qinngasaarneqartaleqqaarama atuarnissara kajumigiunnaaraluarpara. Eqqarsaannalerpungali qinngasaarisut oqaasii soqutigiunnaarniarlugit. Taama eqqarsarneq iluaqutaavoq, ullumikkullu ikinnguteqarpunga.
- Sooruna qinngasaarisoqartartoq?
- Qinngasaarisup qinngasaakkami sanngiiffii ujartortarpai. Qinngasaarneqaqqittuuguma qinngasaarisoq qujaffigissagaluarpara. Taama eqqarsarnera eqqumiissinnaavoq, ilumuuissumimmi qujassannginnama. Qinngasaarnerli iluatsinngikkaangat qinngasaarinerit unittarput. Taamaattumik kamassimalernermit eqqissisimasumik tigugaanni pitsaaneruvoq. Meeqqat inuusuttuaqqallu ilagigaangakkit qinngasaarisarnerit unitsinneqarnissaat anguniartarpara.
- Meeraalluni qinngasaarneqarluni qanoq ittarpa?
- Qinngasaarneqaraangama aliasulertarnikuuvunga, sianiinnerartittarnikuuvungami. Tamanna pillugu oqalliseqateqarnissaq ajornakusoornikooqaaq. Angajoqqaat oqalliseqatigisinnaanngikkaanni aanaakkut ikinngutilluunnii oqaloqatigisarnikuuakka qinngasaartittarnera pillugu.
Ikiaroorlunilu imertaleraluartoq
- Misigisatit qanoq sunniuteqarpat?
- Ikiaroortupilussuunikuuvunga, qaammatini sisamani ullut tamaasa ikiaroortarlunga. Aamma imigassartorlunga. Tassanngaannarli unitseriataarpakka. Imminut aperaanga aliasuutinnut taakku iluaqutaanersut.
- Ikiaroornartummi qarasara ajoqquserpaa. Siuariaqqikkusunngeqqaarpunga. Unitsipparali. Aanaakkut aataakkullu ikiuutaalluaqaat. Maannakkut ukioq ataasinngorpoq kingullermik ikiarooramali. Ilaatigut immiaarartortarpunga, aqussinnaavarali. Nuannisarsiutitut isiginngilara. Qujanartumik aqussinnaalereerpara. Ilaasali ajoraluartumik aqussinnaaneq ajorpaat. Misilittakkakka neriuppunga ilinniutigineqarsinnaassasut.
- Siunissami sulerinissat takorloorpiuk?
- Ilinniarusuppunga, GU-mi piloternissara eqqarsaatigaara. Mittarfimmi sulerusuppunga, danskisut tuluttullu pikkorisserusuppunga. Siunissannut pilersaaruteqarpunga, pilersaaruteqarnera nuannareqaara.
Kalaallit Røde Korsiat-Inuata neriuutigaa inuusuttut amerlanerusut misigisimasaminnik ikiueqataasinnaassasut. Inuimmi tamarmik ikiueqataasinnaapput. Ikiuilaartoqarnerani annertuumik ikiuisoqartarpoq.
Kalaallit Røde Korsiat suleqatigalugu allaaserineqartoq Sermitsiaq.AG-mi saqqummiunneqarpoq