katsorsartinneq

Inuusuttut iluatsittumik katsorsarneqartut

Inuusuttut Københavnimi najugaqartut arlallit periutsimik inuusuttunut siunertaqartumut peqataareerlutik atornerluisuujunnaarput

Inuusuttut atornerluinerminnit katsorsarneqartarput (assi toqqorsivimmit).

Inuusuttut eqimattat hashimik imaluunniit imigassamik atornerluinerminnik qallunaat peqatigalugit, danskit katsorsaavianni maanna katsorsarneqaleruttorput. Katsorsaariaaseq 14-init 25-inik ukiulinnut saaffiginnittuuvoq.

- Katsoraariaatsip atulerneqarneranit inuusuttut Kalaallit Nunaannneersut amerlasuut iluatsittumik katsorsarneqartareerput, maannakkullu arlaqartut kalaallinik aallaaveqartut katsorsarneqarput, Nanna Lehrmann, Center for Unge og Rusmidlerimeersoq Sermitsiaq.AG-mut oqarpoq.

Inuusuttut misilittagaat ilanngunneqartut
Katsorsaaviup Allorfik suleqatigileqammerpaa, taanna aanngajaarniutit pillugit ilisimasanik siammarteriviuvoq, maannakkullu kommunini tamani pilersinneqaleruttorpoq. Tassami Allorfik suliniutinut Københavnimi katsorsaaviup misilittagaqarfigilluagaanut soqutiginnippoq.

Tassunga tunngatillugu kalaallit inuusuttut Københavnimiittut, maanna katsorsarneqareersut pingaarutilittut inissisimapput.

- Inuusuttut taakku uagutsinniittut imaluunniit uagutsinneereersimasut apersussavagut, taakkumi siunnersuutigut ilitsersuutigullu kalaallit atugaannut tulluarsarnissaannut qulakkeerinneqataassapput, Nanna Lehrmann, Center for Unge og Rusmidlerimi attaveqarnermut siunnersortaasoq oqarpoq.

Atuaruk: Københavnimi katsorsaariaaseq Nunatsinnukaanneqalersoq

Minnerpaamik 250 millioninik akeqartoq
Atornerluineq, imigassamik aamma hashimik kiisalu aningaasanoorajuttuuneq ilanngullugit, inuiaqatigiinnut 250 millionit aamma 316 millionit missaanni ukiumut aningaasartuutaasarput. Tamanna atornerluineq pillugu inatsisissatut siunnersuummi tusarniaatigineqaqqammersumi oqaaseqaammi atuarneqarsinnaavoq.

Peqqissutsimut aamma isumaginninnermut suliniutit, aningaasarsianik annaasaqarneq aamma pinerluttuliornerit akisusarput. Kisianni katinneranni innuttaasut hashimik pujortartarnerat, aningaasanoorajunnerat aamma imigassartornerat aningaasartuutaanerpaapput.

- Aningaasat uku amerlassusaat atornerluinermut kisimi toqqaannartumik aningaasartuutaapput. Atornerluisuni peroriartorsimanermi ilinniagaqannginneq aamma toqqaannanngitsumik sangutitsisullu kisitsisini ilanngunneqanngillat, oqaaseqaammi allaqqavoq.

Atuaruk: Suleqatit imigassarsunnippa?

Tamannalu pissutigalugu Naalakkersuisut imigassartornerup, aningaasanoorajunnerup aamma ikiaroorajunnerup akiornissaanut annertuumik suliniuteqarniarlutik nalunaarutigeqqammerpaat.

Atuarnerup nalaani katsorsartinneq
Katsorsaavik inuusuttunik Danmarkimut nuussimasunik ikiuisartoq, katsorsaanermik misilittagaqarluarpoq. Suliniut U-turnimik taaguuteqarpoq, taannalu ilaatigut inuusuttut katsorsartiutigalutik atuarnerannut suliniutaavoq.

Taannalu maanna kalaallinut tulluarsarlugu nalilerneqassaaq.

- Danskit uagut periuserput maanna Kalaallit Nunaannut eqqutiinnarneqannginnissaa pingaartuuvoq. Ilisimasanik peqarluta aggissaagut, taakku nammineq suliniutinik ineriartortitsinissamut sakkutut atorsinnaassapput, Dan Orbe, Center for Unge og Rusmidlerimi pisortaagallartoq oqarpoq.

Atuaruk: Ataatsimik ukiulimmut anaanaq: Naartusunut imigassartorneq inerteqqutaalersinniarli

Powered by Labrador CMS