peqqinnissaq

Inuusuttut ilisimatuut peqqinnissaq pillugu ataatsimiinnissamut piareersartut

Inuiaqatigiinni ikittunik inuttalinni ilisimatusarnermut ileqqorissaarnermut apeqqutit tunngasut oqallisigineqarput

Peqqinnissaq pillugu ataatsimeersuarnissaq NUNA MED 2016 sioqqullugu, siunissami ilisimatusartussat inuiaqatigiinni ikittunnguanik innuttalinni ilisimatusarneq ileqqorissaarnerlu pikkorissarfigaat. Ph.d-tut ilinniartut pikkorissarnermut peqataapput.

- Peqqinnissaq pillugu ataatsimeersuarnissaq NUNA MED sioqqullugu ‘Ph.d-nngornianik aasaanerani pikkorissaasarneq’ qulequtsiullugu aaqqissuisarneq ileqquliunnikuuarput, pikkorissaanermi ilinniartitsoq Gert Mulvad oqarpoq.

Atuaruk: Ilisimatuut peqqinnissamillu sulisut Nuummi katersuupput

Nammineq ilisimatusaatigisamik saqqummiussineq
Inuusuttut ilisimatusartut ukiormanna inuiaqatigiinni ikittunik inuttalinni ilisimatusarneq ileqqorissaarnerlu paasisaqarfigissavaat. Tassa imaappoq inuiaqatigiinni ikittuni, kikkut tamarmik imminnut ilisarisimasuni ajornartorsiutit pilertartut oqallisigissavaat.

- Ph.d-nngorniat aasaanerani pikkorissarneranni issittumi ilisimatusarnermi siuttuusut peqinnissakkullu sullissisut misilittagartuut oqalugiarlutillu suleqatigiissutigisanik (workshop)- sammisani immikkut toqqakkani itisiliisuni aqutsisuussapput, Gert Mulvad nassuiaavoq.

Atuaruk: Toqutsinerit imatut pinerusarput

Tamatuma saniatigut ilisimatusartunut oqaloqatigiittarfimmik pilersitsinissaq eqqarsaataavoq, tassani nammineq ilisimatusarfitsik saqqummiutissallugu periarfissaqassapput.

Ataatsimeersuarneq
Sammineqartut atituujupput, sammisat ilagaat Kalaallit Qallunaat Nunaanniittut Kalaallillu Nunaanniittut akornanni tingukkut aseruuttoorneq/tingulluut Hepatitis B, Kalaallit kræftimik piartuutillit nappaammut ersiutaannik katsorsaaneq qarasaasiakkullu nakorsiartitsissut atorlugu nikallunganermik nappaatilinnik katsorsaaneq.

Pikkorissarneq ataatsimeersuarnermut NUNA MED-mut piareersaataavoq, taanna arfininngorpat aallartissaaq. Tassani ilisimatuut aamma peqqinnissamut tunngasunik suliaqartut ilisimasallit 286-it sammisat Kalaallit Nunaannut attuumassuteqartut oqallisigissavaat.

Powered by Labrador CMS