Inuusuttut hashimik atornerluisartut katsorsartiffissaat amigaatigaa

Meeqqat inuusuttuaqqallu 18-t inorlugit ukiullit ikiaroornartumik atuilersimasut katsorsartinnissaannik immikkut ittumik neqeroorsinnaanissamik Naalakkersuisut suliaqassapput.

Siunnersuut Inartsisartuni tamaginni taperserneqarpoq.

Bendt B. Kristiansen (IA) siunnersuuteqartuuvoq.

- Ukiuni kingullerni annertuumik oqallisigiuartakkatta ilagaat ikiaroornartumik atornerluinerup annertusiartornera, taamatullu aamma atornerluisut ukiukilliartornerat, siunnersuutini inersuarmi saqqummiukkamiuk, taama oqarpoq.

Hashi akiorniarlugu nuna tamakkerlugu iliuusissatut pilersaarut aallartinneqalersoq iluarisimaarlugu taassuma oqaatigaa. Siunnersuisarfiit Allorfittut ittut paasititsiniaanerillu ilaatigut iliuuserineqassallutik.

Inuunerup sinneranut sunniuteqartartoq

Taamaattoq taanna isumaqarpoq inuusuttuaqqanut immikkut suliniuteqarneq annikippallaartoq.

- Misissuisimanerit takutippaat inuusuttuaqqat qarasaasa suli inerilluannginneranni hashimik atuineq aallartissimappat qaratsamut ataavartumik ajoqusernermik kinguneqarsinnaasoq, tamannalu inuunerup ingerlanerni ajornartorsiutinut assigiinngittunut aporfeqartitsisarmat aamma takussutissaqartoq, ilaatigullu ilinniartut ilinniakkaminnik unitsitsiinnartarnerini peqqutaaqataasut ilagalugu taamatullu suliffimmik tigumminniinnarsinnaanermik ajornartorsiutini takussutissaalluni, Bendt B. Kristiansen nangilluni oqarpoq.

Meeqqat minnerit

Peqqissutsimut Naalakkersuisoq, Agathe Fontainip (IA) ajornartorsiut iliuuseqarfigineqartariaqartoq isumaqataaffigaa. Meeqqat atuarfiini atuartut 15-17-inut ukiullit 9 procentii ullut 30-it kingulliit iluanni hashimik pujortarsimapput, taassuma 2014-mi misissuinermi paasineqarsimasumut tikkuussivoq.

Aammattaaq meeqqat mikinerit hashimik pujortartalersimasut nalunaarutigineqartarnerat akulikilliartulersimavoq. Ajornartorsiullu meeqqanut inuusuttunullu ulloq unnuarlu paaqqinnittarfinni annertusiartuinnartoq aamma paasinarsisimalluni.

- Tamakkulu pissutaapput ajornartorsiutip taamak annertusitigilersimaneranut, Agathe Fontain akissuteqarluni oqarpoq.

Taanna paasissutissiivoq, Allorfik, Atornerluisuunermut aamma Siusissukkut Suliniutinut Ilisimasaqarfik, inuusuttuaqqanut katsorsaariaatsinik misissuilluni aallartissimasoq. Atornerluisuunermiit ajornartorsiutit allat ajornartorsiutaanerusarput, suliniummilu tamanna immikkut isiginiarneqassaaq.

Taperserneqartoq

Allorfiup danskit aningaasaliisartui amerikamilu universitetia sulieqatigalugit, Nunatsinni inuusuttuaqqanut katsorsaariaatsit suut pitsaanerusinnaanerat misissorpaat.

- Taamaammat katsorsaariaatsit sunik imaqarsinnaanersut misissuiffigalugit Naalakkersuisut aallartereerpaat, taamaattorli massakkut suliniutissatut pisariaqartinneqartut pillugit suleqatigiinnermik suli aallartitsisoqarsimanani, Agathe Fontain allappoq.

Siunnersuummi sulineq aallartereernikoq nanginneqarniarnera pissutigalugu, taanna tapersiivoq.

Inatsisartut isumaqatigiillutik siunnersuut ataatsimiititaliamut suliareqqitassanngorlugu ingerlateqqippaat.