Inuusuttut Facebook tunuppaat

Inuusuttut angajulliit Facebook atorumajunnaarpaat. Anaanap ataatallu marsertarnerat pissutigalugu.
Imaanngilaq Facebookimik atuinerat annikilliinnartoq. Inuit naapittarfiat "atorunnaapajaavissimavoq".
Taamatut isumaqarpoq professor Daniel Miller, University College London-imeersoq.
Professori EU-p aningaasaligaanik misissuinermi peqataasimavoq.
Tassuuna 16-18-inut ukiullit nunani arfineq-pingasuni inuit naapittarfiinik atuinerat misissorneqarsimavoq, ilaatigut Tuluit Nunaanni, Indiami Kinamilu. Danmarki misissuinermi ilaanngilaq.
Misissuineq naapertorlugu inuusuttut Facebookimik atuinerat annikilliartupiloorpoq, taamatut allappoq aviisi The Telegraph, taassumalu professor Miller atorfillit nittartagaanni allaaserinnissimasoq issuarpaa.
Taanna allappoq inuusuttut Facebook-imi profil-ertik attatiinnaraat ilaquttamik utoqqaanerusut attaveqarfiginerat attatiinnarniarlugu.
– Amerlasuut Facebookimut attuumassuteqarnertik kanngusuutigaat, taanna oqarpoq.
– Inuusuttut amerlasoorsuanngorlutik taanna tunuppaat taarsiullugulu inuit naapittarfii allat atorlugit, inuit ajornerpaat, angajoqqaat, Facebook-imik atuinertik nangikkaat, taanna allappoq.
Aviisi naapertorlugu Miller nangilluni allappoq angajoqqaat aallaqqaammut ernumassutigisimaggaat qitornamik Facebookimik atuisalernerat. Maannali qitornaat oqarput angajoqqaamik Facebook atuinnaqqugaat inuunermilu pisut tamaasa oqaluttuarisarlugit.
– Angajoqqaat paasisimavaat inuit naapittarfii qanoq atorneqartarnrsut, ilaquttanullu attaveqarfissatut isigalugu. Qitornaasali allat pikkuginerusatik atulerpaat, professori oqarpoq.
Taanna aamma isumaqarpoq inuusuttut Facebook tunuttaraat anaanamit ikinngutitut qinnuigineqaraangamik.
Taarsiullugu inuusuttut attaveqaatit soorlu Instagram, Snapchat aamma WhatsApp atuleraluttuinnarpaat.
Qitornavit Facebook-imi profil-iannut qanoq isumaqarnerit tusalaartigu